اربعین نوحه‌سی

قافیله‌یئ غم دوباره گلدی دشت-ی-نئینوایه

زینب-ی-سییاه معجـه‌ر، تئزه‌ده‌ن باتێب قـرایه

قبــر-ی-پـاکـه یئتمـه‌میش کیـم، دۇردۇ بیــر ازه‌ل دایـانــدێ

رنگی سوْلدۇ دۆشدۆ بیهوش، بسکی قلب-ی-زاری یاندێ

سپــدی ســۇ یــۆزینــه بیمــار، آچــدێ گــؤزلـه‌رین اوْیاندێ

چکـدی تـا اؤزیـن یـئتیــردی، قبـــر-ی-شـــاه-ی-کربـــلایــه

دیل آچاندا اووه‌ل-ی-امر، اوْلمادێ دیلـی دانێشسێن

تـا گلیـب دئـدی بـراده‌ر، کاش کـی بـۇ زینب اؤلسۆن

من نئجه گؤرۆم مزارین، کاش گؤزله‌ریـم کوْر اوْلسۇن

هاردادێر اجه‌ل کی وئرسین، عؤمریمی منیـم فنایـه

مــن فــدا سنیـن وفـاوا، ائــی عـزیز-ی-جان براده‌ر

باش گؤتۆر مزاریده‌ن دۇر، باشێمه اوْلـۇب نه کۆللـه‌‌ر

سن اؤله‌ن سوْرا گؤرۆبدۆر، بۇ باجێن نه قاره گۆنله‌ر

دستگیر اوْلۇبدۇ شئمر-وْ-ائبن-ی-سعد-ی-بی‌حیایه

سن شهید اوْلۇب داغێلدێ، شؤکه‌ت-وْ-جلال-وْ-جاهێم

اۆستۆمه قوْشۇن تؤکۆلدۆ، یاندێ جۆمله خئیمه‌گاهیم

چادریــم تالانــدێ بــاشــدان، اوْلمــادێ بیــر پنـاهیـم

تـاپمـادێـم اومـۇد قـارداش، یـالـوارێب گئـدیـم هـارایـه

باش آچێــق بــۆره‌هنــه نــاقــه، زینبــون سـوار اوْلۇبدۇر

کوفه ده‌ن دییار-ی-شامه، شئمر-ی-دون دوْلانـدێرێبدیر

چارسوده خلق ایچینده، اهـل-ی-بئیتی ساخـلاییبـدیر

صف بئصه‌ف ائدیب تماشا، دۆشمه‌ن آل –ی مصطفی‌یه

جۆمله غمله‌رینده‌ن آرتێق، بیرجه غم منی آلێبـدێر

چوْخدۇ خیجله‌تیم براده‌ر، نه دئییم بیله‌ن نوْلۇبـدۇر

بیــر رقیــه آدلــێ نـازلـێ، خورداجا قێزین اؤلۆبدۆر

آج خرابه تــوْپـراق اۆستـه، دردی یئتمـه‌دی دوایـه

ساچـلارێــم آغـاردێ غمــده‌ن، بسکــی آه-وْ-نـالـه قێلدێم

گؤزله‌ریم دۆشۆب اێشیقده‌ن، آغلادێم زئ بس کوْر اوْلـدۇم

اؤز ائـویمـی یاخشـێ یێخــدێـم، من نئجه بۇ دشته گلدیم

اینـدی گــؤر قالێبـدێـر حســـره‌ت، لئیلـی تـک آنــا بـالایــه

نائحــا حــۆسئینــه هــر کــس، زائــر اوْلســا اربـعیــن ده

وار یقین اوْ شخص-ی-مؤمئن، یوْخ هراسی جان وئره‌نده

ائــی خــودا نصیــب ائیلــه، بیــرجــه اربعیــن گــۆنــۆنده

زائر اوْلسۇن اهل-ی-مجلیس، جۆمله شاه-ی-کـربـلایـه

شاعر: نائح

قتلگاه نوحه‌سی

گـۆن دۇتـۇلدێ باتدێ آی، گلـدی شب-ی-یلـدا یئـره

زولف-ی-زینب‌دن آخۇب، قان ظهر-ی-عاشورا یئره

پُر تلاطیم ائیله‌دی، گـویـا سێنـۇب عرش-ی-خـودا

حنجه‌ره خنجه‌ر قوْیۇب، قاتیل؛ ائـدوب خنجه‌ر نــوا

بوسـه‌گـاه-ی-حضــرت-ی-محمــودی اؤپــدۆ برمـلا

معجه‌رین باشدان سروب صدّیقه‌ی-ی-کبری یئره

قانیله‌ن بیر دسته‌ماز آلدێ، حۆسئن روکن-ی-نماز

خنجــه‌ر آلتێنــدا ائـــدوب، آلـلاهـیلــه‌ن راز-وْ-نییـاز

عاشیق-ی-قرآنیدیر، شاهنشه-ی-مولک-ی-حئجاز

جبـرئیــل امــر خـودا ده‌ن گتـدی بیـر تغـرا یئــره

سایه سالدێ شهپه‌رینده‌ن شاه-ی-دین اعضاسینه

قـان یــارالاردان آخار اولدی، آخـۇب صحـراسینـه

گـؤردی جبـریـل غــرق اوْلـۇبدۇر، لخته قان دریاسینه

باش آچۇب گلسون گره‌ک، پئیغه‌مبه‌ر-ی-طاها یئره

عرض ائدوب آللاه سنه، گؤنده‌ردی منده‌ن بیر سلام

وئـر ایجـازه دوْغـرانـان قـۇربـانـلارۇن ائتسـون قییـام

سجده‌دن قالخێـزدێ باشێـن بـاخـدێ بـالایـه ایمـام

گؤردی سایه جبرئیـل، سالمێـش عجـه‌ب تنهـا یـئره

نوطقه گلدی شهپه‌رون چـک سایـه سالمـا یاره‌یـه

شمس-ی-عاله‌م تؤکسۆن آتش خون-ی-بافواره‌یـه

قـانیلــه‌ن اوْخــلار چکـوب، اعضا دل-ی-صد پاره‌یه

یاره‌لـرده‌ن قـان آخـۇب، یـازدێ بـۇ گۆن اینشا یئره

وئـرمیشـه‌م قـۇربـان جـوانانـی سۇسۇز ایسلامه من

ائیله‌ره‌م خیدمه‌ت کسیلمیش، باشیله‌ن احکامه من

قتـل‌گـَهـده‌ن گئتمـه‌ره‌م ائــی جئبرئیـل اخیـامـه مـن

خئیمــه‌ده زولفــون یـوْلـۇب معجـه‌ر آتـۇب افتـا یئـره

حضرت-ی-پئیغه‌مبـه‌ریـن قانــۇنێنــێ ائحیـا ائــده‌م

آیه‌ی کهفـی جیدا اۆسته، گئدۇب معنــا ائــده‌م

قانیمیلـه‌ن مـن علی حقّین یازۇب اینشا ائـده‌م

دۆشمۆشـه‌م آتدان سلـامــه‌ت جبـرئیـل آیا یئـره

اۆچ یـاشێنـدا بیـر قێـزێـم وار زولفله‌رین آلمێش اله

داغ-ی-اکبــر واردێ دیلــده، اوْخ وۇرۇبــدۇر حرملــه

قــوْلـلارێ باغلـێ مینیر اهـل-وْ-عیالیــم محمیلــه

آخمئیـۇب قـانێـم یـارالاردان بـۇ گـۆن بیجا یئــره

«ثابیتا» ال آت حۆسئینین دامه‌نینده‌ن دۇت اؤزۆن

آلتێ گوشه قبـریده قالـدێ سنون آغلار گـؤزۆن

هر مکاندا داییر ائتدی ماته‌مـی نیسگیل سـؤزۆن

زینـب‌ون آهـێ گتـوردی محشه‌ر-ی-کبری یئره

قوْشار: اردبیللی ثابت

حضرت علی اکبر(ع) نوحه‌سی

گلئیدی لئیلی جانینه، گؤزۆن فداسی اکبریم

اوْلۇبدۇ باشێوێن قانێ، الون حناسی اکبریم

تالانمێسان ورق-ورق، چمنده یاسمن کیمی

جهانه بیر اوْغۇل گله‌ر، مگر دوباره سن کیمی

نه بیر آنا اسیر اوْلار، کمند-ی-ظۆلمه من کیمی

سالار شراره عالمه، اۆره‌ک نواسی اکبریم

اوْن سگگیز ایلدی من سنون، انیس-وْ-غمگسارۇوام

دیندیر منی گؤزل بالا، اسیر-ی-داغدارۇوام

سن مست-ی-کردگارسن، منده سنون خمارۇوام

دۇر دۇت الیمده‌ن ای منیم، الیم عصاسی اکبریم

عبانی یۆزده‌ن آچ باخێم، تئلوندا نقش اوْلان قانا

آنا دئ سسله سن منی، هوسله من دئییم جانا

اؤپۆم اوْ قانلێ گؤزلرون، سێزێلدایێم یانا-یانا

سالێندێ باشێمه دئییم اوْغۇل قاراسێ اکبریم

قوْیما اوْ قانلێ کێپرێگۇن، پرده چکه گؤز اۆستۆنه

بۇندان علاوه غملرون، کؤز قالێیا کؤز اۆستۆنه

قوْی بیر یارالێ باشێوێ، ایندی آلێم دیز اۆستۆنه

گؤر نئجه دیلده لئیلینین، وار اوْخشاماسێ اکبریم

دیداریوه اگر علی، گله‌نده قالمێشام دالا

نفسده‌ن آز قالێر منی، بۇ غملی آیرێلێق سالا

ایجازه وئر یانا-یانا، آیاغێوێ اؤپۆم بالا

یوْخ سنده‌ن اؤزگه لئیلی‌نین، بیر آشناسێ اکبریم

دانێش بیرآز دیلونداکی، اوْلان ملالیوی بیلیم

هؤرۆگۆمۆ آچێم علی، دوْداغێوێن قانێن سیلیم

ثوابی واردێ لۆطف ائله، یۆزۆمه گۆل قێزێل گۆلۆم

اوْلسۇن گۆله‌ن یۆزۆن منه، وصلت نداسی اکبریم

درخت-ی-باغ-ی-عؤمریده‌ن، گۆل-ی-مُرادی درمه‌دیم

توْیۇندا لاله یاندێرێب، گلین هؤرۆگۆ هؤرمه‌دیم

بخت اوْتاغێن آچاندا سن، الی حنالی گؤرمه‌دیم

ساغالمایاندێ قلبیمین، بۇ بیر یاراسێ اکبریم

منیم اۆره‌کده دردیمی، فراق اوْدۇن چکه‌ن بیله‌ر

اوْغۇل دالێجا دائما"، یوْللارا گؤز تیکه‌ن بیله‌ر

پرپر اوْلان گۆلۆن غمین، شئیدا بیله‌ر، اکه‌ن بیله‌ر

آنانێ فوری پیر ائده‌ر، هیجران بلاسی اکبریم

باشیوه قاتلون وۇرۇب، جدّون علی کیمی یارا

اۆستۆمه قَیته‌ریب منیم، بخت آینامێ پارا-پارا

سن هارا نازنین اوْغۇل، قانه باتان عبا هارا؟

یاراشمئییر وجودیوه، بۇ توْی لیباسی اکبریم

دارێخدێ قلبیمین باشێ، دانێش منیله گۆل یۆزه

اوْ قاره زۆلفێوێ بالا، بۇ قدری سالما گۆل یۆزه

آدامسێزام، کؤمه‌کسیزه‌م، بیر باخ منیله گؤز-گؤزه

گلئیدی سینه‌مه دئییم، گؤزۆن قاداسێ اکبریم

قوْشار: سیّد تقی سیفی اردبیلی

حضرت علی اکبر(ع) نوحه‌سی

اکبـر دیلـه گـل، غمـزده لئیلانـی دانێشـدێر

آچ قانلێ گؤزۆن بۇ ائوی ویرانی دانێشدێـر

چسبنده ائدیب بیربیرینه لب‌لریوی قان

دیلده‌ن سنی نه نوع سالێب فرقه‌ی-ی-عُدوان

یا اینکه سێنێب قلبون آنوْندان سنه قۇربان

دیندیرمه منی زینب-ی-عُلیانی دانێشدێر

قان پرده چکیب گیزله‌نیب آی ماه جمالون

هرچه باخێرام گؤرمۆره‌م اوْل هاشیمی خالون

هیجران یئلی خاموش ائله‌ییب شمع-ی-وصالون

سن‌سن آناوێن شمع-ی-فروزانی دانێشدیر

ای شمع-ی-شبستان سنی کیم ائیله‌دی خاموش

قێرمێز سنه گئیدیردی آنوْن اوْلدۇ سییه‌پوش

باخدێقجا سنه محنت-وْ-دردیم ائله‌ییر جوش

قلبیم آلێشێر بۇ دل-ی-سوزانی دانێشدێر

کیم وار کیمه ایظهار ائله‌ییم دردیمی بیر بیر

منله‌ن دیله گلمیرسن اوْغۇل منده نه تقصیر

هئچ من دئمیره‌م من آنوْوام بیر منی دیندیر

آغوشیوه آل اصغر-ی-عطشانی دانێشدێر

کم نور ائله‌ییبسه‌ن گؤزۆمۆ ای دۇتۇلان آی

کشف ائیلییه‌بیلمه‌م سؤزۆمۆ ای دۇتۇلان آی

من کی دئمیره‌م تک اؤزۆمۆ ای دۇتۇلان آی

بیر عدّه گؤزۆ یاشلێ پریشانی دانێشدێر

باخدۇقجا سنه ائیله‌ییره‌م قلبده‌ن افسوس

عؤمرینده‌ن ائدیب درد-وْ-غمون لئیلینی مأیوس

جیسمیم ائله‌ییب خسته اوْلان روحیمی محبوس

قوْیما علی روحیم اوْلا زندانی دانێشدێر

عفو ائیله اوْغۇل قالدێم اگرچه گئجه گلدیم

واللاهی اێشێقلێ گۆنۆم اوْلدۇ گئجه گلدیم

گلدیم باشێوێن اۆستۆنه امّا نئجه گلدیم

منده‌ن خبر آل سن بۇ قضایانی دانێشدێر

قوْشار: نخستین اردبیلی

حضرت علی اکبر(ع) نوحه‌سی

علـی سـن کفن گئییبسه‌ن، ائیله‌سین نه چاره لئیلا

دایــان حســرتیلـه ائتسیـن، سنـه بیـر نیظـاره لئیـلا

منی گؤرمه‌گه گلیبسه‌ن، بدنونده خلعت اوْغلۇم

آناوێلا بئش دقیقه، اوْتۇر ائیله صحبت اوْغلۇم

اله چوْخ چتیندی دۆشسۆن، بئله بیر سعادت اوْغلۇم

سنی گؤرسه قان ایچینده، گؤره‌جک دوباره لئیلا

نئجه ائیله‌ییم تحمّل، بۇ فراق-ی-جاوداندا

منیم عزّتیم بیلیرسن، سنه بسته‌دیر جاهاندا

اۆره‌گیم فرحله‌نَردی، یۆزیوه باخان زاماندا

دۆشۆر ایندی گۆل یۆزۆنده‌ن اَبدی کناره لئیلا

یئری وار غموندا ناله‌م، گر اۇجالسا آسمانه

صفحات-ی-زندگیمی، عوض ائیله‌دی زمانه

بیلیره‌م کی خوْش گۆنۆمده‌ن، منه قالمادێ نیشانه

نه قده‌ر وار عؤمری داییم، گله‌ر آه-وْ-زاره لئیلا

منی آغلادێر علاقه‌م، سنه کشف‌دیر قضایا

اۆره‌گیم دۇتۇبدۇ رعشه، بدنیم اسیر سراپا

نفسیم دۆشۆبدۆ تنگه، اؤلۆره‌م یوْخۇمدۇ یارا

یئری واردێ خئیمه‌لرده، دۆشه ایحتیضاره لئیلا

دانێشام سؤزۆم سنیله، اۆره‌گیمده وار مفصّل

ولی ائیلیره‌م خولاصه، سنی ائتمه‌ره‌م معطّل

بیلیره‌م قَییتمه‌گۆن یوْخ، سنین ای قتیل-ی-اوّل

یاخێن اوْلدۇ باشه قاره، سالا بخت-ی-قاره لئیلا

سنی ای غزال-ی-زیبا، سالار اوْوچێلار کمه‌نده

باشێما سالار قرآنی، باشۇوا قێلێج اَنه‌نده

چێخارام اؤزۆمده‌ن اکبر، باشۇن اۆستۆنه گله‌نده

نئجه تاب ائده‌ر باشۇندا، گؤره واردێ یاره لئیلا

دؤز اوْ قدری تار-ی-زۆلفۆن، علی بیر داراخلایێم گئت

قوْی اؤپۆم دوْداقلارۇندان، سنی بیر قۇجاقلایێم گئت

الیوی نئچه دقیقه، سینه‌م اۆسته ساخلایێم گئت

بۇ غموندا گؤر دۆشۆبدۆر، نه قده‌ر فیشاره لئیلا

قوْشار: انور اردبیلی

حضرت علی اکبر(ع) استمدادی

گل عُقابیده‌ن یێخێلدێم، بابا ارض-ی-کربلایـه

قالێـب اکبـرون آراده تئـز اؤزۆن یئتیـر هـرایه

اوْ گـۆلـه وارێمـدێ بنــزه‌ر قێـرێلێبــدێ خـول بۇداقدان

سارالێبدێ شاخ-وْ-برگیم قان آخێر سۇسۇز دوْداقدان

نئجه گؤر دوچار-ی-خاره‌م، بابا دۆشمۆشه‌م آیاقـدان

گتیـریــب بـابـام پئیمبــر، ســۇ اؤزۆ سـۇسـۇز فدایه

اوْ قده‌ر وۇرۇبلا یاره، سۇ کیمی راواندێ قانێم

یارا یاره اۆسته دگمیش یارالاندێ خسته جانیم

منه گل ترحّم ائیله سنه وار فقط گۆمانیم

یئتیر ای اومید-ی-عالم، اۆزۆنۆ بۇ غم فزایه

من اوْ اکبرم جمالیم رُخ-ی-مصطفی‌ٰ‌یه بنزه‌ر

گۆل-ی-گۆلشن-ی-پئیمبر، گۆل-ی-باصفایه بنزه‌ر

گۆل سُرخ تک یایاقلار داغێلان دمایه بنزه‌ر

اوْلۇ جاری قان یۆزۆمده‌ن گئدیره‌م بۇ گۆن بقایه

سنی گؤزلۆر اکبر اوْغلۇن بیلیسه‌ن جمالی سوْلمۇش

قان آخێب دوْلۇب عُذاریم نئجه بحر موجه دوْلمۇش

بلی کوکب-‌ی-امامت یۆزۆ احمرانه اوْلمۇش

گۆنۆ گؤزلئییر سیتاره، آخێرێ بۇ نئینوایه

بۇ صدانی شمس-ی-عزّت ائشیده‌نده رنگی سوْلدۇ

گؤزۆنه چکیلدی پرده نئجه چیشمه آب دوْلدۇ

دۇتۇلۇبدۇ مئهر-ی-تابان، غمی بی‌نهایت اوْلدۇ

دئدی فوری ذوالجناحی گتیرین گئدیم مینایه

اوْ شهین جمالی سوْلدۇ دوْلانێب دؤنۆبدۆ زرده

بیر الی بئلینده گلدی گؤرۆب اکبرینی یئرده

اوْدۇ شاه-ی-کربلانین اۆره‌گی گلیبدی درده

بۇیۇرۇب منیمده آهیم چێخێب ایندی نُه سمایه

نئجه رزمگاهه گلدی گئدیب الده‌ن ایختیاری

بلی ذوالجناحین اۆسته‌ن یئره دۆشدۆ انکساری

دئدی وای اوْغۇل کسیلدی آتاوێن داخێ قراری

یۆزۆ اۆسته تا سۆرۆننه‌م عمل ائیله‌ره‌م وفایه

قوْشار: حیرانی اردبیلی

حضرت علی اصغر(ع) نوحه‌سی

الیم اۆسته شیرخواره، بالام اوْخلانێبدێ زینب

ال آیاق چـالانـدا اصغـر، اۆره‌گیم یانێبدێ زینب

دئ روبابه ائیله‌مه‌ز ناز سنه سۆد امه‌ر دوباره

بوْیانێب قومادی قانه بوْغازینه دگدی یاره

قالاجاق همیشه خالی، بیلیره‌م اوْ گاهواره

پر آچێب اۆچۆب بهئشته، قوْنا یوْللانێبدێ زینب

باجێ مُرغ-ی-دل بۇ چؤلده قفس-ی-جهانی آتدێ

نه گؤزۆن آچێب اوْیانماز، قانێنا بوْیاندێ یاتدێ

دوْلانێب هیلال-ی-ماهیم، الیم اۆسته چێخدێ باتدێ

آلێشێب فراق اوْدۇندا اۆره‌ک اوْدلانێبدێ زینب

دئ روبابه گلمه‌ز اصغر، آلاجاق کمین قۇجاقه

اوْنۇلان حسین قوْیۇبدۇر باجێ بیر دوْداق دوْداقه

باجێ من گله‌نده قێزلار، قوْل آچێب گلیب قباقه

بۇ امامت حقّین اعداء، جمع اوْلۇب دانێبدێ زینب

بیری اوْلمادێ بۇ چؤلده بالامێ آلا الیمده‌ن

اۇجالێب سمایه آهیم، باجێ یاره‌لی دیلیمده‌ن

بۇ حسین کئچیبدی جاندان چکیلیب الیم ائلیمده‌ن

سۇ یوْلۇ حسینه گؤردۆن، نئجه باغلانێبدێ زینب

باجێ جوشه گلدی قانێم، بالامێن چێخاندا جانی

اوْخا باخدێ بۇ حسین‌ین، باشا یئتدی امتحانی

نظر ائیله اللریمده‌ن بوْیادێ بۇ قان هوانی

بۇ خییامیده عزاسی، اوْدۇ باشلانێبدێ زینب

دایانێب اوْ قان هواده، باجێ روز-ی-محشر اوْلسۇن

شُهدا دؤشۆنده قانێ، چو مئدال-ی-اکبر اوْلسۇن

اوْ مئدال-ی-پُربهایه، یازێلان پئیمبر اوْلسۇن

بالامێن اوْدۇر هواده، قانێ ساخلانێبدێ زینب

اوْ قانێن جلالی چوْخدۇر باجێ سهل سانماق اوْلماز

علم-ی-یزیدی یێخدێ، اوْ علم باجێ اۇجالماز

منی سربلند ائدیبدیر باجێ یئرده قانی قالماز

اۆره‌گیم بۇ کربلاده نئجه داغلانێبدێ زینب

باجێ مُهر ائدیبدی اصغر، قانێ دفتر-ی-حسینی

بَشره ائدیبدی ثابت، چون علی ولایت‌ینی

بۇ قانێن شراره ناری سالا شامه شور-وْ-شینی

بوْغازێ کیمین حسینین دیلی اوْخلانێبدێ زینب

قوْشار: ثابت اردبیلی

جناب علی‌اصغر(ع)‌ین آناسێ دیلیجه نوحه 2

دوْلان قـانیلــه قــوْنـداقــێ

علی لای‌لای بالام لای‌لای

قێــزاردان قـانـێ توْپـراقی

علی لای‌لای بالام لای‌لای

گۆلۆستانین گۆلۆ سوْلسۇن

پوْزۇلسۇن پایمال اوْلسۇن

بالا سن‌سیز روباب اؤلسۆن

علی لای‌لای بالام لای‌لای

الیمده‌ن کیم سنی آلدێ

بئله توْپراقلارا سالدێ

آنان یاخشێ مله‌ر قالدێ

علی لای‌لای بالام لای‌لای

آنا دهرین بلاسینده‌ن

دؤنه‌رمیش اؤز بالاسینده‌ن

علی لای‌لای بالام لای‌لای

اێشێقلێ اۇلدۇزۇم آتدێن

منی توْپراقیده یاتدێن

نه تئز چێخدێن، نه تئز باتدێن

علی لای‌لای بالام لای‌لای

آنان بۇ حالت-ی-زارون

گؤرۆب اوْلدۇ گیریفتارون

دۇ گل بوْش قالدێ گهوارون

علی لای‌لای بالام لای‌لای

سنی بی‌حال ائده‌ن اوْخدۇ

یانان بۇ حالیوه چوْخدۇ

ولی لای‌لای دییه‌ن یوْخدۇ

علی لای‌لای بالام لای‌لای

کؤنۆل دردینله سرخوْشدور

قۇجاقیمده یئرون بوْشدۇر

اؤزۆم لای‌لای دییه‌م خوْشدۇر

علی لای‌لای بالام لای‌لای

مگر دوشمن امان وئردی

سنه رحمین نیشان وئردی

گؤرۆب سۆد یوْخدۇ قان وئردی

علی لای‌لای بالام لای‌لای

علی سن‌سیز سنی آندێم

سمندر تک اوْدا یاندێم

سسیمه سس وئر اوْدلاندێم

علی لای‌لای بالام لای‌لای

شل اوْلسۇن قاتلون آخر

خزان ائتدی گۆلۆن آخر

نوْلۇب شیرین دیلون آخر

علی لای‌لای بالام لای‌لای

اوْیان درد-وْ-بلان آللام

دۇرۇنجا سن اوْیاق قاللام

کئشیکچین من اؤزۆم اوْللام

علی لای‌لای بالام لای‌لای

سۆدیله‌ن دوْلدۇ پئستانیم

دور ای شمع-ی-شبستانیم

بهار-ی-باغ-وْ-بوْستانیم

علی لای‌لای بالام لای‌لای

بۇ صرّاف-ی-سییه‌نامه

یئتیردی شئرین اتمامه

یینه باشدان یازار خامه

علی لای‌لای بالام لای‌لای

قوْشار: صرّاف

جناب علی‌اصغر(ع)‌ین آناسێ دیلیجه نوحه

عطشان قـالێب گـۆل تک سـوْلان

لای‌لای اصغریم ای وای اصغریـم

ای قــان ایـچیـب سـیـــراب اوْلان

لای‌لای اصغریم ای وای اصغریم

کیم بئشیکده‌ن آلدێ یئرین

توْپراقلارا سالدێ یئرین

سینه‌مده بوْش قالدێ یئرین

لای‌لای اصغریم ای وای اصغریم

دهرین گۆلۆ سوْلسۇن اوْغۇل

سوْلسۇن خزان اوْلسۇن اوْغۇل

بی‌کس آنان اؤلسۆن اوْغۇل

لای‌لای اصغریم ای وای اصغریم

منی دئمه‌زدیم آتاسان

قێرمێزێ قانه باتاسان

لای‌لای دئییم یاتاسان

لای‌لای اصغریم ای وای اصغریم

سن یاخشێ شیرین دیلیدین

خوْش اوْخۇیان بۆلبۆلیدین

گل آخیرینجی گۆلیدین

لای‌لای اصغریم ای وای اصغریم

اوْخ سنی بی‌تاب ائله‌ییب

آلوده‌-ی-خواب ائله‌‌ییب

قانیله سیراب ائله‌ییب

لای‌لای اصغریم ای وای اصغریم

ای تازه گۆل تازه نهال

حالین اوْلۇبدۇ حال به حال

خێردا بالام یات یۇخۇن آل

لای‌لای اصغریم ای وای اصغریم

سسله‌ر سنی داد‌رسین

سس وئر اگر وار نفسین

اؤلمه‌میسه‌ن نوْلدۇ سسین

لای‌لای اصغریم ای وای اصغریم

سینه‌م نه‌دن داغلامێسان

شیرین سۆده باغلامێسان

توْخسان مگر آغلامێسان

لای‌لای اصغریم ای وای اصغریم

بئیله خراب ائتمه منی

بی‌صبر-وْ-تاب ائتمه منی

دیل‌دن کباب ائتمه منی

لای‌لای اصغریم ای وای اصغریم

ای آهوی-ی-وادی-ی-شوق

بوْینۇندا وار رشته‌ی-ی-ذوق

قاندێر بۇ یا قێرمێزێ طوق

لای‌لای اصغریم ای وای اصغریم

من غرق-ی-بحر مُحنم

صرّاف-ی-شیرین سُخنم

دییه‌ن اؤزگه‌دیر نه منم

لای‌لای اصغریم ای وای اصغریم

قوْشار: صرّاف

حضرت علی اصغر نوحه‌سی امام حسین(ع)‌ین دیلیجه

منیم گۆل تک سوْلان اوْغلۇم

علـی لای‌لای بــالام لای‌لای

جفـاده‌ن اوْخــلانـان اوْغلـۇم

علـی لای‌لای بـالام لای‌لای

عطش سنده نمایاندور

عجب حالون پریشاندور

بوْغازۇن پئیکرون قاندور

علی لای‌لای بالام لای‌لای

ستمله باغریقان اوْلدۇن

خَدَنگه سن نیشان اوْلدۇن

آچۆب گۆل تک خزان اوْلدۇن

علی لای‌لای بالام لای‌لای

یئتیب چوْخ ظۆلم قاتلده‌ن

آتێب اوْخ چونکو غافلده‌ن

سنی سالدێ اوْغۇل دیلده‌ن

علی لای‌لای بالام لای‌لای

سنی گتدیم بۇ مئیدانه

وئره‌م سۇ لعل-ی-عطشانه

باتێب جیسمون قێزێل قانه

علی لای‌لای بالام لای‌لای

آنان آغلار فراقوندان

کنار اوْلدۇن قۇجاغێندان

اؤپه‌نمه‌ز گۆل دوْداغۇندان

علی لای‌لای بالام لای‌لای

منیم قلبیم باشێ یاندێ

کؤمک‌لر جومله دوْغراندێ

بوْغازۇن بئیله اوْخلاندێ

علی لای‌لای بالام لای‌لای

اۇزاق دۆشدۆن گۆلۆستاندان

بوْیاندێ جیسمون آلقاندان

سۇ ایچدون نوک-ی-پئیکاندان

علی لای‌لای بالام لای‌لای

شهید اوْلدۇن لبون عطشان

بوْغازۇندان آخێر آلقان

سنی وئردیم قۇزۇ قۇربان

علی لای‌لای بالام لای‌لای

باتێبدێر قانه روخسارون

گۆزه‌لدیر رنگ-ی-گۆلنارون

اوْغۇل بوْش قالدێ گهوارون

علی لای‌لای بالام لای‌لای

قوْشار: مضطر اردبیلی

حضرت ابوالفضل(ع) نوحه‌سی

زینبیـم گـل عـلمـداریـم اؤلــدۆ

با شهامت سپهــداریـم اؤلــدۆ

منتظر قالماسێن شیرخواریـم

قهــرمـان-ی-وفـاداریـم اؤلـدۆ

هم ساغێندان گئچیب هم سوْلۇندان

دؤنمئییبدیر ولی حق یوْلۇندان

سینه‌سی اۆسته پرچم اسیردی

قان سۆزۆردۆ یئره هر قوْلۇندان

زینبیم گل علمداریم اؤلدۆ

قان بۇ غمده گره‌ک قلبه دوْلسۇن

وار یئری گۆل گۆلۆستاندا سوْلسۇن

خئیمه‌سینین یاتێردێن ستونین

قارداشێم اؤلدۆ باشۇن ساغ اوْلسۇن

زینبیم گل علمداریم اؤلدۆ

با شهامت سپهداریم اؤلدۆ

یاندێرێر قلبیمی اوْخ سؤزۆنده‌ن

ماجراسین ائشیتدیم اؤزۆنده‌ن

گوئیا تلّه ساری باخێرمێش

اوْخ دگیب ناگهان ساغ گؤزۆنده‌ن

زینبیم گل علمداریم اؤلدۆ

سینه‌سی یاره‌لی باش یارالێ

ائیله‌ییب آلنێنێ داش یارالێ

حقّی وار اؤلمه‌گه گؤرسه قارداش

جان وئریر تئشنه قارداش یارالێ

زینبیم گل علمداریم اؤلدۆ

اوْخ دگیبدیر اوْلۇب مشگی پاره

مشگینه آغلئیور گؤزده یاره

غئیرته باخ اوْ حالتده گؤردۆم

آختارێر اصغره راه-ی-چاره

زینبیم گل علمداریم اؤلدۆ

گؤردۆم آغلێر دئییر جان رقیّه

یوْللارا باخما حئیران رقیّه

گئت ربابه دئنه‌ن باغلا قاره

اصغره یوْخدۇ درمان رقیّه

زینبیم گل علمداریم اؤلدۆ

پرچمین ساخلئیوب سینه اۆسته

گوئیا گۆل دۇرۇب دسته دسته

گؤرجه‌یین ایسته‌دی قالخا یئرده‌ن

پئیکری یاره‌لی خسته خسته

زینبیم گل علمداریم اؤلدۆ

یات دئدیم یات ادبلی وزیریم

یات شرافتلی غئیرتلی شیریم

نئیلیره‌م گۆنده باتسا باتێبدێر

باتدێ علقمده ماه-ی-مُنیریم

زینبیم گل علمداریم اؤلدۆ

با شهامت سپهداریم اؤلدۆ

قوْشار: حسین غفّاری اردبیلی

حضرت ابوالفضل(ع)ین جوشی نوحه‌سی

یاتمـا ای مرد-ی-مئیـدان ابوالفضـل

کشته‌ی-ی-راه-ی-قرآن ابوالفضـل

قالمێشام یاره‌لـی باشـۇن اۆستـه

اللـریـم بئلــده گیـریـان ابـوالفضـل

شبنم-ی-سُرخ اوْتۇرمۇش یۆزۆنده

یاس دۇتۇب یاسمن گۆلشن آغلێر

سۇ کیمی تئللروندان سۆزۆر قان

تئشنه قێزلار کیمی سوسن آغلێر

گؤر نه احواله قالمێش حسینون

حالیمه دوره‌ده دوشمن آغلێر

آی کیمی گۆل جمالون اوْلۇبدۇر

قان محاقینده پئنهان ابوالفضل

گل دیله بیر حسینی دانێشدێر

قلبیمین باشێنێ غۆصصه یاردێ

آغلادێم قانیوی ساغ گؤزۆنده‌ن

گؤزلریمده‌ن آخان سئل آپاردێ

گؤز آچێب باخمێسان هئچ حسینه

ساق گؤزۆنده مگر یاره واردی

قاره گؤزلرده‌کی قانه اوْلسۇن

منده قێزلاردا قۇربان ابوالفضل

چال سێنان شهپرون قۇملار اۆسته

قان سپیلسین بۇ صحرا بزه‌نسین

گلسه مئهمان جناندان بۇ دشته

قصریوین فرشینی قوْی بَیه‌نسین

زینیده‌ن دۆشسه توْپراقه پئیکر

پنجه ایسته‌ر بده‌ن راحت اوْلسۇن

پنجه‌سیز توْپراق اۆسته دۆشه‌نده

تاب ائدیبسه‌ن نئجه جان ابوالفضل

بۇ سؤزۆ آل-ی-عئصمت بیلیبدی

ین اوممید-ی-حرم‌سن اوَلده‌ن

آلدێ ادرکنی صوتون حَرَملر

خئیمه‌ده عرصه‌گاه-ی-جَدَلده‌ن

سن اوْلان خئیمییه جمع اوْلۇبلار

آتدێلار جومله سۇ جامین الده‌ن

ایسته‌میر تئشنه قێزلار سۇ سنده‌ن

آچ گؤزۆن یاتما عطشان ابوالفضل

تاپماغا سۇ کنارینده جیسمون

گلمیشه‌م سن گله‌ن یوْللارۇندان

ای وفا سروی اؤپدۆم یوْل اۆسته

ظۆلم-ی-خنجر سالان خوْللارۇندان

مشگیده‌ن سۇ آخان تک آخێر قان

توْپراقا قطع اوْلان قوْللارۇندان

خئیر-ی-مقدم یازێبدێر حسینه

قوْللارۇندان آخان قان ابوالفضل

بیر ائله حالدادێ یئرده جیسمون

سانکی گۆلزار-ی-ایمان داغێلمێش

قامت-ی-سرو-ی-رعنا یاتێبدێر

لاله‌ی-ی-باغ-ی-ریضوان داغێلمێش

یاکی شیرازه‌ده‌ن خارج اوْلمۇش

یئرده گویا کی قرآن داغێلمێش

جیسمیوی حمل ائده‌م خئیمه‌گاهه

یوْخدۇ واللاهی امکان ابوالفضل

قوْشار: هادی اردبیلی

حضرت ابوالفضل(ع)ین جوشی نوحه سی

دؤره‌مـی گل حسین دوشمن آلدێ

قوْلـلارێمــێ جفـــا ایلـــه سالـــدێ

تــرک قێـل خئیمـه‌نـی گـل آمانـدێ

چـوْخ یـۇبـانمـا گـؤزۆم یوْلدا قـالـدێ

گل حسین گل حسین گل حسین جان(2)

شیریوی سالدێ دوشمن کمنده

حئیف اوْلا یوْخدۇ قوْللار بده‌نده

سسله‌دیم من سنی داده تئز گل

ساغ گؤزۆمده‌ن اخا اوْخ دگه‌نده

تــرک قێـل خئیمـه‌نـی گـل آمانـدێ

چـوْخ یـۇبـانمـا گـؤزۆم یوْلدا قـالـدێ

گل حسین گل حسین گل حسین جان(2)

سوز-ی-دل بللیدی گؤزیاشێمدان

اؤللـه‌م ال چکمه‌ره‌م قارداشێمدان

گؤردۆ قوْلسۇز منی نوفل-ی-دون

وۇردۇ آهن عمودی باشێمدان

تــرک قێـل خئیمـه‌نـی گـل آمانـدێ

چـوْخ یـۇبـانمـا گـؤزۆم یوْلدا قـالـدێ

گل حسین گل حسین گل حسین جان(2)

هارداسان ای نئگار-ی-دل‌آرا

محشر اوْلدۇ من-ی-زاره برپا

مرکب اۆسته‌ن دۆشه‌ن وقته قوْلسۇز

قوْللارێن آچدێ مئیداندا زهرا

تــرک قێـل خئیمـه‌نـی گـل آمانـدێ

چـوْخ یـۇبـانمـا گـؤزۆم یوْلدا قـالـدێ

گل حسین گل حسین گل حسین جان(2)

پرچمی سن گل آل نوکروندان

عاشئق-ی-خسته-وْ-مضطروندان

نعشیمی خئیمه‌گاهه آپارما

چوْخ خجل اوْلمۇشام اصغروندان

تــرک قێـل خئیمـه‌نـی گـل آمانـدێ

چـوْخ یـۇبـانمـا گـؤزۆم یوْلدا قـالـدێ

گل حسین گل حسین گل حسین جان(2)

ای ائده‌ن زنده دین-وْ-صلاتی

قوْیدۇم حئیره‌تده آب-ی-حیاتی

ایچمئیینجه حسین سن سرین سۇ

ایچمه‌ره‌م اؤلسه‌م آب-ی-فراتی

تــرک قێـل خئیمـه‌نـی گـل آمانـدێ

چـوْخ یـۇبـانمـا گـؤزۆم یوْلدا قـالـدێ

گل حسین گل حسین گل حسین جان(2)

قوْشار: فرهاد فکری

جناب علی‌اکبره‌ آتاسێ دیلیجه نوحه

ای گـۆل کیمـی قانــه باتـان

اکبریم اوْیان، یاوه‌ریـم اوْیـان

قــان ایچــره نــازیـلـه یـاتـان

اکبریم اوْیـان، یاوه‌ریـم اوْیـان

خئیمه‌لره گلدی سسین

گلدیم اوْلام دادرسین

اؤلمه‌میسه‌ن وار نفسین؟

اکبریم اوْیـان، یاوه‌ریـم اوْیـان

ای کشته‌ی-ی-تیغ-ی-ستم

هئجرین ائدیب قدّیمی خم

گؤزله‌ر یوْلۇن اهل-ی-حرم

اکبریم اوْیـان، یاوه‌ریـم اوْیـان

شام ائتمه لئیلا گۆندۆزۆن

چوْخ منتظر قوْیما گؤزۆن

ایندی هلاک ائیله‌ر اؤزۆن

اکبریم اوْیـان، یاوه‌ریـم اوْیـان

ای سرو-ی-گۆل پیرهنیم

باغ-وْ-بهشت-وْ-چمنیم

سن‌سیز گۆلۆم سوْلدۇ منیم

اکبریم اوْیـان، یاوه‌ریـم اوْیـان

سن منه بیر یوْلداشیدین

آغلار گؤزۆمده یاشیدین

هم اوْغۇل هم قارداشیدین

اکبریم اوْیـان، یاوه‌ریـم اوْیـان

توْپراقلارا قوْیما یۆزۆن

دۇر دئ منه اۆره‌ک سؤزۆن

آچ بیرجه اوْ قانلێ گؤزۆن

اکبریم اوْیـان، یاوه‌ریـم اوْیـان

گلدیم جیگر داغلاماغا

اوْغۇل دئییب آغلاماغا

گؤزلریوی باغلاماغا

اکبریم اوْیـان، یاوه‌ریـم اوْیـان

قالمێش الیم اۆسته الیم

باشه یئتیب چون اَجلیم

صبر ائیله قوْی منده گلیم

اکبریم اوْیـان، یاوه‌ریـم اوْیـان

تیغ-ی-جفا خامه کیمی

جیسمون یازێب نامه کیمی

سنله‌ن وارام شامه کیمی

اکبریم اوْیـان، یاوه‌ریـم اوْیـان

صرّاف-ی-دینار-ی-غمم

نقّاد-ی-نقدی-ی-اَلمم

بۇ سؤزده ثابت قدمم

اکبریم اوْیـان، یاوه‌ریـم اوْیـان

قوْشار: صرّاف

نوحه حضرت علی اکبر

یارالاندێم ای شه-ی-کربـلا

اؤلـۆره‌م هـراییمـه گـل بابا

اوْ گلـه‌ن قــدم‌لــریـوه فــدا

اؤلۆره‌م هـراییمـه گــل بابا

یئتیشیب وجودیمه اوْخ زبس

داغێلێبدێ سینه باتێب نفس

بۇ نفسده وئر منه بیرجه سس

اؤلۆره‌م هـراییمـه گــل بابا

سنه چون یئتیب چوْخ اذیّتیم

اوْدۇ چـوْخ وارێمدێ خجـالتیـم

بـــۇدۇر اوّل آخــــر زحـمتیــم

اؤلۆره‌م هـراییمـه گــل بابا

منی قصد ائدیبدی گلیر اجل

بۇدۇ فکری درک ائده ال به ال

اوْ گلینجه سن باشێم اۆسته گل

اؤلۆره‌م هـراییمـه گــل بابا

بۇ گۆن ایستی‌سی بۇ جیگرده سوز

عطشیم دمادم ائده‌ر بروز

بدنیم یارالێ اؤزۆم سۇسۇز

اؤلۆره‌م هـراییمـه گــل بابا

بابا وِردی ذکریم اوْلۇب «تَعال»

منی گل بۇ حالیده یاده سال

باشێمێ گؤتۆر دیزین اۆسته آل

اؤلۆره‌م هـراییمـه گــل بابا

بده‌نیم یارالارێ قان وئریر

بۇ قان اؤزگه حالی نیشان وئریر

بابا گل گؤر اوْغلۇوۇ جان وئریر

اؤلۆره‌م هـراییمـه گــل بابا

بابا ائیله اکبریوه کرم

یوْلا گؤز تیکیب سنی گؤزله‌ره‌م

باشێم اۆسته گلمه‌سن اؤلمه‌ره‌م

اؤلۆره‌م هـراییمـه گــل بابا

گؤرۆب اهل-ی-کین بابا تک منی

یێخێب آتدان اؤلدۆره‌جک منی

گل آماندێ کؤلگییه چک منی

اؤلۆره‌م هـراییمـه گــل بابا

بۇ حسین عزاسی‌دی یاز رضا

اؤزۆ بئیته بئیت وئریر جزا

بۇ سؤزۆ دوباره دئ دۇت عزا

اؤلۆره‌م هـراییمـه گــل بابا

شعر: صراف