ویردون ای چرخ ندن فرصتی اشرار الینه
رشتهی کار گچوب مرد تبهکار الینه
نه روا بلبل او ذوقیله قفسده یاشیا
گل او اندازه لطافتله دوشه خار الینه
حکم زندان ویریله یوسفه تقوایه گوره
مصر قبضه اولا بیر حاکم جبّار الینه
سن مگر ساحریدون رمز طلسماتیله
قورخیدان تاپشوراسان گنجی سیه مار الینه
نه صلاحیله امیر ایتدون عبیداللهی
ویرر عاقل نجه قدّارهنی غدّار الینه
وریلا سکّهی اسلام یزیدون آدینا
ویریله سنگر دین شارب و خمّار الینه
اختیارات آلنا صاحب تقوادن اگر
تاپشوراللار سر یحیانی زناکار الینه
بیعت ایتمز ابیعبدالله عبیداللهه
ساربان ظلمینی هر چند ایده تکرار الینه
یتشوب جاه و مقامه هامی قدّارهکشان
بندهلر بند چکوب زبدهی احرار الینه
حکمتیلن بیر ایشون اولدی پسندیده فقط
ذوالفقار ارث یتشدی شه ابرار الینه
گرچه دورد اوغلی ئولوب آلتی جوان قارداشی
آز قالور عترتی مقهور اولا اغیار الینه
ئوزی تک دورهسی دشمن اورهگی داغلی سوسوز
بیر نفر یوخ ویره ال حقّه طرفدار الینه
باشینون اوسته حرارت ایاقی آلتدا غبار
دورت طرف دشمن آلوب نیزهی خونخوار الینه
سوونوللر اوقدر عرصهده یالقزلقنا
سانکه درّنده سالوب طعمهی پروار الینه
بله فکر ایلدیلر ضعف دوتوب اندامین
زنده تسلیم اولاجاق لشگر جرّار الینه
ذوالجناح اوسته دوزلتدی بوکولن قدّین امام
صفلره باخدی گله نقشهی پیکار الینه
دیدی لشگر سیزی اوچ امره مخیّر ایدورم
بو اوچوندن بیرینی تاپشرون اقرا الینه
یا قویون باش گوتوروم قورخلی قزلاریملن
یوز قویوم چوللره باش ویرمیوم اشرار الینه
یا بیر آز سو ویرون اوّل منه یاندی جگریم
آنادان ارثدی سو عترت اطهار الینه
یا اگر یوخدی سیزون جنگدن آیری هدفوز
کمگیم یوخدی منیم گوزتیکم انصار الینه
من تکم جنگیمه تک تک گلون ای قوم شریر
تا ویریم هر نفرون باطله طومار الینه
تن به تن جنگی قبول ایتدی فقط سعد اوغلی
ئوزیده قیلدی تماشا گله معیار الینه
بیر یزید آدلی کیشی ابطحی شهرت ملعون
چخدی صفدن آلوب ئوز جانینی مردار الینه
آچدی آغزین دیهسن که آچلوب قبر یزید
سبقت ایتدی نجس آغزیندا کی گفتار الینه
ناسزا باشلادی مردان سزاوار حقه
ناقهی عسگر شیطان ویروب افسار الینه
مرکب کفره ایدوب عایشهی نفسی سوار
تاپشروب عهد رسولاللهی انکار الینه
ساق رکابندن ایاقین چخادوب بیکس امام
صول رکاب اوسته سالوب لنگر بسیار الینه
ئوزی بیر فنّدی بو، کیم صولا لنگر سالسا
ساق طرفدن یغشار قدرت سرشار الینه
بیر قلج وردی او نامرده بو کیفیتلن
اولدی جبریل امین صدقیله زوّار الینه
دیدی ظالم منی سن اولما آدامسیز گوردون
ویرمرم لحظه امان یوز بِله کفّار الینه
زور بازوی ولایت هله سربسته قالوب
ذوالفقار آلمامشام خالق قهار الینه
آستینمدن اگر دست ولایت چخادام
یتمز ئوز پیکریمون زحمت و آزار الینه
بیر نفر زنده قوتارماز آپارا شهره خبر
کوفهدن ابن زیادون ویره آمار الینه
الغرض بیر بِله اخطار و نصیحتله گنه
اولدی بیر آیری مبارزده گرفتار الینه
اونادا وردی صولوندان افقی بیر شمشیر
باشی لعنت اوخودی گویده طمعکار الینه
گلدی بیر بیر واریدی کیمده بیر آز باد دماغ
دگمدی قانلاریدا حجت دادار الینه
ذوالفقار ایتدی عجب قابض الارواحه کمک
باشلاری یوللادی پیشواز ایده همکار الینه
گچدی صفلر دالنا فارس و شجعان عرب
شمر آلوب ریش عمر سعدی بَرَصدار الینه
دیدی بو جنگی قبول ایلدون آخر نیهسن
زُبده سرکردهلریم یاندی شرربار الینه
دیدی من فکر ایلدیم اوغلی ئولنلن طرفم
شیر غضبان قوجالان وقته نه زنهار الینه
قویمادوز کعبهده ایتسون اونی رمی جمره
ایندی باشلاری یغور داش کیمی فخّاز الینه
ورار اعدا باشینی داش یرینه ابلیسه
حجّی تکمیل اولا جان تاپشورا دلدار الینه
حمله فرمانی ویریم ایندی بو سایسیز قوشونا
فتنهدن بند چکیم حیدر کرار الینه
نهر علقم طرفین خالی ایدون معرکیه
باغلیوم حیله طنابین بو فداکار الینه
بو غریبون یولی دوشسه سو کناریندن اگر
قوللاری سست اولاجاق باخسا علمدار الینه
شمر سسلندی بو روشندی که ذیالجوشن آتام
مکریده باش گلر ابلیسون او مکّار الینه
بو شهون قولارینی باغلاسا زینب باغلار
زینبون نالهسی فوراً ایدر اخطار الینه
من ئوزوم خیمهلرین دورهلیوم سیزده ئوزین
ویرمیک مهلت اونون صاعقه رفتار الینه
وردیلار طبل یورش یوزمین عدوّ اللهه
آلدی هر کس گنه بیر زهریلی ابزار الینه
باش آچوب فاطمه صدقیله ایدوب راز و نیاز
بو غریب اوغلومون الله ئوزون اول یار الینه
ذوالجناح اولدی فقط یالقز امامون کمکی
اللرین قوزادی سبقت ایده سالار الینه
قولاقین شهلدی بیر شیحه چکوب قزدی گوزی
راکب و مرکب ایدوب حمله کماندار الینه
صف اوّلده تلف ایتدیله یتمیش نفری
صف دوّمده اولوب قرخی گرفتار الینه
قاچاقاچ دوشدی صف چارمی سوّم یخدی
صف پنجمده شکست اولدی سزاوار الینه
بو هیاهوده یتوب خیمیه شمرون قشونی
ساچلارین آلدی گنه خیمهده قزلار الینه
قولی سست اولدی امامون چکوب ال دعوادن
زینبون آلدی سسین اولدی نگهدار الینه
دیدی ای لشگر ناپاک ابیسفیانی
دینوزی ویردوز عجب درهم و دینار الینه
دین یوخوز باری جوانمرد اولون ای قوم شریر
اگمیون بوینوزی بیغیرت و بیعار الینه
منیلن جنگ ایدیسوز تا نقدر وار نفسیم
دگمسین قمچی گرگ زینب بییار الینه
شمر بیر بانگ ویروب لشگر عقبگرد ایلدی
ایتدی تعطیل جفا حکمینی هموار الینه
دیدی بو کفوّ کریمون سوزین اجرا ایلیون
آلسون عمامهسینی احمد مختار الینه
او شهی دورهلدی مور و ملخ تک اوخ آتان
سنگ پرّانلار اگلیدی آلوب احجار الینه
سجدهگاهندن آخوب گل یوزینه ثارالله
کوینگینون اتگین آلدی گهربار الینه
قوزانوب کوینگ اولوب داغ علی اکبر عیان
ایش دوشوب حرملهی شوم و تبهکار الینه
دیدی اوچپر اوخون اوچمینجسیدی شاهد اولون
ایندی قزلاری آلار زلف سمنبار الینه
او شقینونده اوخین چرخ یتوردی هدفه
ایتدی ثاراللهی ایثار نگونسار الینه
سندی صندوق اولوب اسرار شهادت جاری
جنّت تجری من تحتالانهار الینه
دیدی لا حول و لا قوة الا بالله
یارالی باشی دوشوب شمرون او خونخوار الینه
شاعر: استاد منزوی مرحوم
تاپا بیر یارالی یارالینی
گوره قارداشین توکه گوز یاشی
اویادا وفالی یارالینی
باجیسندان ایستدی مرکبین
سسینی آلاندا وزیرینون
قدمین رکابه قویاندا شه
علمین گورردی امیرینون
یخلوب گیدینجه علم یره
ایتوروبدی ردّینی شیرینون
نه اوقانلی پرچمینی گورور
نه ده مشگی خالی یارالینی
نهقدر که سسلور اَخا اَخا
ایشیده دوباره صداسینی
کمک ایتدی فاطمه ناگهان
تاپوپ انکساریله قارداشین
ایکی قول یول اوسته گوروب اَوَل
الیوب عذارینه گوز یاشین
دالسیجا هی دولانوب تاپا
کسوگ اللرین یارالی باشین
نه گوروب او قوللاریلان بیر آز
یخلوب آرالی یارالینی
گوتوروبدی باشدان عمامهسین
دیدی ای همای شرف دانیش
گورورم بیر آز رمقون قالور
ایلمه بو وقتی تلف دانیش
بلورم دالونجا آنام گلوب
آپارور بهشته طرف دانیش
چاغورار جنانه جهانیدن
بلی ذوالجلالی یارالینی
بودا فضل حقدی که ایستدی
چخا یاددان اکبریمون غمی
ایله یانمادیم غم اکبره
بو غمیله داغلادی سینمی
دور ایاقه خیمیه بیر گیدهک
گوزی یولدا قویما رقیمی
گوره بلکه گوزلمیه قیزیم
داخی ماه و سالی یارالینی
دونه داشه تخم وفا اگر
هر اورکده حاصله گلمسه
قزلون عیارینی کیم بلر
محکی مقابله گلمسه
غم و غصه بلبلی لال ایدر
گل اگر گولوب دله گلمسه
ایله ذوقیلن گتوروب دله
او شهون وصالی یارالینی
دیدی ای مراد مسیح دم
نفس مقدسی کیمیا
نچه ایلدی تشنه، مریدوم
بله خالصانه و بی ریا
الوی چک ایندی بو گوزلره
سن ای عالمون گوزینه ضیا
سنی یوخسا گورمسه ئولدورر
بو اسفلی حالی یارالینی
نیه ایندی سندن اورک سوزین
ایلیوم نهان گیدورم حسین
منی ئوز خجالتیم ئولدورر
اورگیمده قان گیدورم حسین
ئولورم وفالی رقیهدن
ایله ناگران گیدورم حسین
سو دینده هر دم اوتاندیرور
حرمون مارالی یارالینی
شاعر: استاد رحیم منزوی اردبیلی
آز قالدی کی دعواده یتسون خطر عباسه
قان گوزلرینی دوتموش وئرمور خبر عباسه
قوللار قلم اولموشدی قان گوزلره دولموشدی
آغلاردی مدارینده شمس و قمر عباسه
صاق گئتدی کسر گئتدی صول گئتدی سپر گئتدی
باش کاسهسی اولموشدی تنها سپر عباسه
دورت سمتدن اوخ دگدی بیر آخ دئمدی والله
دیل یارهلری اولدی اوخدان بتر عباسه
کسدی قباقین ناگه بیر غول قوی پیکر
بیر آهن عمود آلتدا سالدی نظر عباسه
سسلندی، علی اوغلی نه گلدی او قوللاره
بو سوز یارالاردان چوخ، ائتدی اثر عباسه
ناگه او عمود آهن گزدی باشی اوستونده
جان جان دئدی زهراده والا گهر عباسه
زین اوسته ابوالفضلی بیر صاق صولا ترپتدی
لایلای چالینور گویا شوریده سر عباسه
بو واقعه واللّهی زهرایه گران گلدی
یر گوی هامی قان آغلار دشمن گولر عباسه
شاعر: استاد منزوی
علی سینمده کی دیرناق یاراسی خاطرینه
بیر آزدا یات سحرون ماجراسی خاطرینه
سوسوزلار الده سو جامی دیلینده یا عباس
دخیل درگه اولوبلار سخاسی خاطرینه
سوسوزلارین چوخی دائم بو دور و برده گزور
گچولّه صاق صولا سو ماجراسی خاطرینه
خیال ایدولّه سو اولسا فقط بو خیمهده وار
سویی ربابه ویرللر بالاسی خاطرینه
اوغول بو سوزلره باعث فقط سوسوزلقدی
همیشه درد سیزیلدار دواسی خاطرینه
خجالتی سنون عباس عمون چکور آرادا
گیدوب اوزاقدا گزور ئوز حیاسی خاطرینه
فقط رقیّه باجوندور گلوب گیدن یانوا
ئوزین هلاک ایدور ئوز دلرباسی خاطرینه
و بیرده سس اوجالاندا گلولّه عمّهلرون
توکولّه گوزیاشی قارداش بالاسی خاطرینه
گرگ سکینهنون آغوشینه ویرم سنیده
دخیل درگه ایده ئوز آناسی خاطرینه
دیه عمو آنامون چارهسی گیدوب الدن
گوزین تیکوب الوه التماسی خاطرینه
او خالی مشکلره دقّتیله بیر باخسان
و لو اولا ایکی قطره شفاسی خاطرینه
توکک بوغازینه راحت گیدوب گله نفسی
ربابون آه دل بینواسی خاطرینه
بالق تک آغزوی تزتز آچوب چخاتما دیلون
ئورگیمون بو ساغالماز یاراسی خاطرینه
من آلتی آی سنه صود ویرممیش غذا یمدیم
باغشلا بو گجه نی غم هواسی خاطرینه
یقین فراتیده ناله ایدور سوسوزلقوا
یاتانموسن او فراتون صداسی خاطرینه
فرات سهلیدی داغ داش یانار سنون حالوا
بو لشگرون عمل نارواسی خاطرینه
چوخ ایستورم آنالار ایچره تک رباب آنووی
بیر امتحان ایدهلر، مدّعاسی خاطرینه
گوزوم پیاله سینه بیر پیاله سو ویرهلر
ویرم بو گوزلروی عمرون بقاسی خاطرینه
شاعر: استاد منزوی
خئیمهلر تالاندێ گرهک نئیلییه زینب
قوشۇن خئیمییه دولدۇ گرهک نئیلییه زینب
قاچیر تلّیده دردین حسینه دییه زینب
گلیر آتلی پیاده خیام اوستونه بیر باش
آتین شئیههسیندهن دۆشۆب لرزهیه داغ داش
غَرض تلّه یئتیشدی آیاق یالێن آچێق باش
حسینین گرهک اوْردا دۇرۇب سسلییه زینب
یۆزۆن مقتله دۇتدۇ اوْ بانوی-ی-گرامی
هارایێنا چاغێردێ نئچه دفعه امامی
حسین هاردا قالێبسان داغێتدێلا خیامی
قَیید خئیمییه قوْیما گله لئشگهر-ی-شامی
کیمی وار گئدیب اوْندان کؤمک ایستییه زینب
باجێ صوتینی قارداش چتین حالیده آلدێ
چێخێب یارهسی یاددان سراسیمه اۇجالدێ
ایکی اللری اۆسته خدایا نئجه قالدێ
یۆزۆ اۆسته سۆرۆندۆ اؤزۆن مقتله سالدێ
حسینین اوْ زامانێن گؤرۆب اؤلمهیه زینب
یۆزۆن لئشگهره دۇتدۇ الین قالخێزێب اوْل شاه
بۇیۇردۇ بۇ سؤزۆمدهن منیم سیز اوْلۇن آگاه
عرب رسمینه رفتار ائدین لئشگهر-ی-گمراه
منی اؤلدۆرۆن اوّل، قالێر خئیمه-وْ-خرگاه
مگر درد ایله دردی دوام ائیلییه زینب
دۇرۇب تلّیده زینب باخێر گؤزلری یاشدێ
گؤرۆب بیردهن اوْ خاتۇن هیاهو اۇجالاشدێ
حصار اوْلدۇ چۇخۇر یئر یاغان نئیزه دی داشدێ
اوْ تلّی نئجه اندی، نئجه مقتله قاشدێ
گلیب بیکس حسینه کؤمک ائیلییه زینب
دئدی لئشگهره یوْخدۇر مگر سیزده مسلمان
نییه یاره وۇرۇرسۇز، گؤرۆرسۆز کی وئریر جان
هوا ایستی قۇم اۆستۆ همی آج همی عطشان
کؤمک یوْخ یارا سایسێز ائدیب غش آپارێب قان
قوْیۇن باری آپارسێن بۇنۇ خئیمییه زینب
حسین خئمییه گئتسین عجب قوْیدۇلار ایداد
گؤرۆب زینب-ی-عُلیا قوْلۇن چێمرادێ جللاد
یۆزۆن قاتله دۇتدۇ دئدی ای ائوی بر باد
اَوَل گل منی اؤلدۆر اوْلۇم غۆصصهدهن آزاد
حسینی قێلێج آلتدا باخێب گؤرمییه زینب
بۇ یاره ایله ساغالماز اۇچۇب روحی هاچاندێر
نفَس تنگه دۆشۆبدۆ قالان بیر قۇرۇ جاندێر
یێخێبسان یۆزۆ اۆسته دالی اۆسته دوْلاندێر
بیر آز صبر ائله ظالم الون ساخلا اماندێر
دوْلاندێرسێن اقلاً یۆزۆن قبلییه زینب
ائدیب هلهَله اعراب، قیام ائتدی قیامت
چێخێب خئیمهسرادن بیر عدّه خانێم عورت
یانێندا بالا قێزلار اَنیب تلّی اوْ ساعت
گؤرۆبلهر قوْشۇن ائیلهر حسین قتلینه سرعت
ائدیب قاتیله حمله دفاع ائیلییه زینب
شاعر: استاد منزوی
اى عمه! منیـم کاش ائلـه امکانیــم اولئیــدى
سینهمـده بو باش، بیر گئجه مئهمانیم اولئیدى
اى کاش بۇنون ذکرینى بیر آن ائشیدئیدیـم
بـۇ قانلێ دوْداقدان گئنـه قرآن ائشیدئیدیـم
هـر دم بابا جانیم چاغێریب، جان ائشیدئیدیم
قوربان بابامین جان سسینه جانیم اولئیدى
اوّلده گرک باوریمى محکـــم ائدئیدیم
پیشــوازه قاچێـب گؤزلریمـى پُر نم ائدئیدیم
گؤزیاشلاریمى جمع ائلهییب مرهم ائدئیدیم
الـده یارالـى لبلـهره درمانیـم اولئیـدى
بیلسئیدیم اگر، اشکیمى یوللاره سپهردیـم
گلسئیدى آیاغیلـه آیاق ردّین اؤپـهردیـم
فرشیم یوْخودو زولفومو توْپراغه دؤشهردیم
ویرانه ائویم لاییق مهمانیم اولئیـــدى
دۇتدو بـو گئجه اوّل شبدن منـى غفلــت
گؤى اهلینى دعوت ائلهیم اوْلمادى فرصت
دوتسئیدیم عزا من بو باشین شأنینه نسبت
جئبریل گرک بو گئجه دربانیــم اولئیــدى
چـوْخ وئردی منـه زجـر، دنی گـؤز یاشـا خاطیر
سرنئیزه ده دۇرمۇشدۇ بو باش یوْلداشا خاطیـر
آلـلاه منـی حیفـظ ائتـدی فقـط بـۇ باشـا خاطیر
عئشقیمده ریضـا اوْلمـادی، نوقصـانیم اولئیـدی
آخئرده یئتیـب، چـوب-ی-جفـا دسـت-ی-یزیـده
وۇردۇ اوْنـۇ غئیظیله لـب-ی-لعـل-ی-شهیــده
زینـب بـیبـیمیـن قـددین اَگیب ائتـدی خمیده
هیچ بیر دئمهدی یاخشێدێ ویجدانیـم اولئیـدی
منزوی
کیم دیلده حسین آدین ایدوب اَزبَر آپاردی
قبره الی بوش گیتمدی بیر گوهر آپاردی
تپراقدا خیانت ایلمز عشق حسینه
قبر ایچره بولر گوهر جان پرور آپاردی
چوخ گورمشوخ عالمده ئولن وقته حسینچی
قبره نه جلالیله اونی اِللّر آپاردی
گیت مجلس ترحیمینه باخ جاه و جلاله
گور عشقیدی یا مسئله دیگر آپاردی
بو عشق قمارینده بلی هیچ کیم اوتوزماز
اوّل اوتوزندا گوروسن آخر آپاردی
هر کیم کی جوان عمرینی بو یولدا اوتوزدی
آخر بله گوردوک آقادان نوکر آپاردی
هر کیم کی بو درگهده قوجالدوقجا اوجالدی
باشی آغاران رتبهی والاتر آپاردی
چوخ آغ گونه چخدی قره تپراقلارون آلتدا
هر کس قره دسمالیلن اشک تر، آپاردی
فکر ایلمهسن آغلادون اشگون هدر اولدی
زر قدرینی از بس تانیدی زرگر آپاردی
سن گورموسن امّا دولانور شیشهسی الده
گوز یاشلارینی فاطمهی اطهر آپاردی
خولینون عیالینه خانم گورنه بیوردی
بو اشگون امانتدی امانت گر آپاردی
چون اوغلوما سن آغلادون الان ئوز ایونده
بو خاطرهنی فاطمه تا محشر آپاردی
استاد رحیم منزوی
ظۆلمهت گئجه، آی دوْرهسینه هاله گلهنده
قوْرخار نئجه شخص اوْلسا، ائدر ناله گلهنده
ایجـاد اوْلـۇنار موختـهلیف اشکال-وْ-عجاییب
تلّ اۆسته و یا اینکـه سییـهه چـاله گلـهنده
ئوز کؤلگهسینه باخسا هراسان اوْلۇ اینسان
قوْرخـار گؤزۆنـه، هئیکـهل-ی-ابطالـه گلهنـده
بیلمهم اوْ حۆسئینین قێـزی اۆچ یاشـدا رقیّه
نـه حالیلـه گلـدی گئجــه گــوْدالــه گلــهنـده
وئردی یۇخۇیا دۆشمهنی دۇردۇ یوْلا دۆشـدۆ
قوْرخــدۇ دۇتــولا فـرقـهیئ جههــالـه گلهنده
حتی ائله گلدی کی اوْنۇ گؤرمهدی بیر کس
سیررین دئمـهدی، عمّـییه، اطفالـه گلـهنده
گلمیشدی همان یوْل کی اوْ زهرایئ سه ساله
حتمــهن ایتیـرهر سـالک-ی- صـد سالـه گلهنـده
فیکر ائیلمه کیم گتـدی اوْنـۇ مقتلـه بیر بـاش
عاشیق یـوْل ایتیرمـهز رهـئ آمالــه گلهنــده
زهـرا سسینی آلـدێ اوْ قێـز مقصـده چـاتدێ
زهـرایـه اؤزۆن ائیلــهدی هــم نالــه گلــهنــده
سس گلدی قێزیم سینهمه گل یاخشێ گلیبسهن
تـۆش اولمـامێسـان شمر-ی-بــد افعـالــه گلـهنــده
دیققهتله باخێب گؤردۆ کی بیر نعشیدی بیسر
آهێ گلی چـۆن شعلـهی-ی-جـووالـه گلـهنــده
سالــدێ اؤزۆنـۆ سینـهسینه ائیلهدی فـــریاد
گـــؤر قالـدێ رقیّوْن بـابـا نـه حالــه گلــهنــده
گاهــی ایاغێــم داشـه دگیب گاه یێخیلدیــم
قان وئردی دیلیـــم دیدهیئ سیّالــه گلـهنـده
امما بابا چۆن شمر یۇخۇدۇ باشێمێن اۆسته
صد شوکــر ائیلهدیم ایندی بۇ مئنواله گلهنده
عالـهم منـه رحم ائیلهدی شمر ائلهمیر امما
تاپشێر منـی بـارێ سـن اوْ قتّـالــه گلـهنــده
یا قوْیسۇن اؤلۆم یا منی اؤز باشیمه قوْیسۇن
لای لای دئییــم اؤز اصغریمـه حالـه گـلـهنـده
سۆد گلمیشدی دؤشلهری دوْلمێشدێ ربابون
قالمێشـدێ آنـام آیـرێ بیــر احـوالــه گلــهنــده
بیر سؤزده دئییم قوْی بابا شمرین سیتهمیندن
گؤر ائتدی نهلـهر خئیمـهی-ی-ائجلالـه گلهنـده
سجادی یۆزۆ اۆستـه سالێـب چکـدی رداسیـن
اوْد وۇردۇ خییامـه، طمــع-ی-مالـــه گلــهنــــده
پــر وۇردۇم اۇچــام بیــر طــرهفه خئیمــه یانانـدا
اوْد شؤعلـه چکیـب دۆشـدۆ، پر-وْ-بالـه گلـهنـده
یانــدێ اتـهگیــم قـارداشێــم عابــد یــانـان اوْددا
یئـر گــؤی سیتـــهم-ی-شئمریله زیلزاله گلهنـده
گـوشـواره چێخێنـجـا قـولاغێمـــدان منــی وۇردۇ
بیــداد ائلـــهدی غــارهت-ی-امــوالــه گـلــهنـــده
سیلــی یئــری معلومیــدی، قمچـی یئـری امما
مـعلــوم اوْلـــۇ ویــرانییـــه، غسّــالـه گلــــهنـــده
غارهت سیتــهمیـن «منزوی» یاد ائلـهییب آغــلار
سـارِیقلــهر الـــی صفحــه-ی-«آماله» گلــهنـــده
شاعر: استاد منزوی
قوْشۇن خئیمییه دوْلدۇ گرهک نئیلییه زینب
قاچێر تلّیده دردین حسینه دییه زینب
گلیر آتلێ پیاده خیام اۆستۆنه بیر باش
آتێن شئیههسیندهن دۆشۆب لرزهیه داغ داش
غَرض تلّه یئتیشدی آیاق یالێن آچێق باش
حسینین گرهک اوْردا دۇرۇب سسلییه زینب
یۆزۆن مقتله دۇتدۇ اوْب بانوی-ی-گرامی
هارایێنا چاغێردێ نئچه دفعه امامی
حسین هاردا قالێبسان داغێتدێلا خیامی
قَیید خئیمییه قوْیما گله لئشگهر-ی-شامی
کیمی وار گئدیب اوْندان کؤمک ایستییه زینب
باجێ صوتینی قارداش چتین حالیده آلدێ
چێخێب یارهسی یاددان سراسیمه اۇجالدێ
ایکی اللری اۆسته خدایا نئجه قالدێ
یۆزۆ اۆسته سۆرۆندۆ اؤزۆن مقتله سالدێ
حسینین اوْ زامانێن گؤرۆب اؤلمهیه زینب
یۆزۆن لئشگهره دۇتدۇ الین قالخێزێب اوْل شاه
بۇیۇردۇ بۇ سؤزۆمدهن منیم سیز اوْلۇن آگاه
عرب رسمینه رفتار ائدین لئشگهر-ی-گمراه
منی اؤلدۆرۆن اوّل، قالێر خئیمه-وْ-خرگاه
مگر درد ایله دردی دوام ائیلییه زینب
دۇرۇب تلّیده زینب باخێر گؤزلری یاشدێ
گؤرۆب بیردهن اوْ خاتۇن هیاهو اۇجالاشدێ
حصار اوْلدۇ چۇخۇر یئر یاغان نئیزه دی داشدێ
اوْ تلّی نئجه اندی، نئجه مقتله قاشدێ
گلیب بیکس حسینه کؤمک ائیلییه زینب
دئدی لئشگهره یوْخدۇر مگر سیزده مسلمان
نییه یاره وۇرۇرسۇز، گؤرۆرسۆز کی وئریر جان
هوا ایستی قۇم اۆستۆ همی آج همی عطشان
کؤمک یوْخ یارا سایسێز ائدیب غش آپارێب قان
قوْیۇن باری آپارسێن بۇنۇ خئیمییه زینب
حسین خئمییه گئتسین عجب قوْیدۇلار ایداد
گؤرۆب زینب-ی-عُلیا قوْلۇن چێمرادێ جللاد
یۆزۆن قاتله دۇتدۇ دئدی ای ائوی برباد
اَوَل گل منی اؤلدۆر اوْلۇم غۆصصهدهن آزاد
حسینی قێلێج آلتدا باخێب گؤرمییه زینب
بۇ یاره ایله ساغالماز اۇچۇب روحی هاچاندێر
نفَس تنگه دۆشۆبدۆ قالان بیر قۇرۇ جاندێر
یێخێبسان یۆزۆ اۆسته دالی اۆسته دوْلاندێر
بیر آز صبر ائله ظالم الون ساخلا اماندێر
دوْلاندێرسێن اقلا" یۆزۆن قبلییه زینب
ائدیب هلهَله اعراب، قیام ائتدی قیامت
چێخێب خئیمهسرادن بیر عدّه خانێم عورت
یانێندا بالا قێزلار اَنیب تلّی اوْ ساعت
گؤرۆبلهر قوْشۇن ائیلهر حسین قتلینه سرعت
ائدیب قاتیله حمله دفاع ائیلییه زینب
شاعر: استاد منزوی
گئتدی عمون سکینه جان، قانه بوْیاندێ گلمهدی
وئردیگی اؤز سۇ قولونا، سندهن اۇتاندێ گلمهدی
زرمده گؤردۆ نظملهن لئشگهر-ی-کفری صف به صف
شطّه گئدیبدی شیر تک، وارث-ی-شحنهی-ی-نجف
نهر فراتی اوّلین حمله ده ائیلهدی هدف
سۇ اله گلدی ایچمهگه نفسی دایاندێ گلمهدی
چێخدێ قۇرۇ دوْداغیلهن بیر سۇلۇ مشگیلهن سۇدان
مکریله کسدی ساق سوْلۇن یاتدێ کمینده کوفیان
چێخماغا نخلزاریدهن دوشمنی وئرمهدی امان
گئتدی سۇ اۆسته اللری، صبری تالاندێ گلمهدی
گؤزدهن علاوه ساخلادێ، مشگین اوْ شیر-ی-جانسپر
چوْخ چالێشێردێ مشگینه سینهسین ائیلییه سپر
حئیف اوْلا قانا دؤندهریب اشگینی ناوک-ی-سهپر
حالینه گؤردۆ مشگینین اشگی رواندی گلمهدی
ایندی گؤزۆمده عؤمرومون بیردی گئجهیله گۆندۆزۆ
بۇپارا مشگیدهن بۆتۆن کشف اوْلۇ مطلبین دۆزۆ
مشگیده اوْلمادێ سۇیۇ گلمهگه گلمهدی یۆزۆ
بوْش الیلهن قَییتمهیی گؤردۆ گیراندی گلمهدی
بیر نفرین الینده کی جنگیده اوْلمادێ کسهر
هر قدهمینده اوْن نفر آتلێ قاباغێنێ کسهر
گؤرمهسه ال حریفده، قانلێلار ال چکهر مگر
کسدیله چون قاباغێنێ، رأیی دوْلاندێ گلمهدی
تن به تن اوْلدۇ روبرو هر کس اوْ پهلوانیلهن
قوْرخمادێ تیریلهن وۇران، وۇردۇ داخێ کمانیلهن
صدمه یئتیبدی باشێنا، گؤزلری دوْلدۇ قانیلهن
گؤز دۇتۇلۇب گؤرهنمهدی، خئیمه هایاندێ گلمهدی
گۆلشن-ی-آرزوده بیر گۆل بیتیرهنمهدیم قێزێم
قالدێ الیم بئلیمده من ال یتیرهنمهدیم قێزێم
بسکی بئلیم شکستیدی تک گتیرهنمهدیم قێزێم
نیکیمی چوْخ سێزێلدادێم قلبیده یاندێ گلمهدی
سرویدی من دئدیم دۆشۆب خول تۆکۆلۆب خول اۆستۆنه
قوْللارێ پیشوازیمه دۆشمۆشدۆ یوْل اۆستۆنه
قوْیدۇ سۇ اشتیاقینه بیر گؤز ایکی قوْل اۆستۆنه
سۇ گینه راضی اوْلمادێ آخدێ جالاندێ گلمهدی
عمّهوه وئر خبر قێزێم نوحه ائدین عزا قۇرۇن
دیلده سۇ آرزوسینه یکسره پُشت-ی-پا وۇرۇن
اؤلدۆ وفالی قارداشێم خئیمهسینی یێغێشدێرون
شهپری شاهبازیمین چوْخ یارلاندێ گلمهدی
قالدێ ستمله یا حسین «منزوی» چوْخ فشاریده
مرجعی یوْخ عدالتون بیر بئله روزگاریده
قلبی یارالێ شیعهلر قالدێلار انتظاریده
قان آلان اوْغلۇوۇن مگر وقتی هاچاندی گلمهدی؟
استاد منزوی اردبیلی
گئتـدون بـابـا اومـمیدیـلـه قـارداش دالـسێـجـا
تؤکدۆم من اۆرهک قانێنێ، گؤز یاش دالسێجـا
آلدێم اله سۇ جامینی فورا" یوْلا چێخدێم
وئردیم بۇ سۇسۇز قێزلارێلان قوْل-قوْلا چێخدێم
سن گئتدون اؤزۆم قێزلارێ گتدیم یوْلا دۆزدۆم
ائتدیم ایکی صف تئشنهلری ساق-سوْلا دۆزدۆم
سیزدهن باباجان ایستهدیم اوْلا دۆزدۆم
فکر ائتدیم علمداریله یان-یانا گلیرسن
آخر نه بیلیم تک بوْیانێب قانه گلیرسن
باخدێم سارالان رنگیوه، ائتدی منی حالی
قارداشسیزین عالمده بئله رنگی سارالێ
بۇ مشک بۇ پرچم ندی بۇ مرکب-ی-خالی
سالار-ی-حرم، صولت-ی-سرداره نه گلدی
قانلێ عَلَمین گتدون علمداره نه گلدی
گؤررهم پارا مشگینده غم-ی-مُبهمی واردۇر
سوْیۇق ائوی آباد اقلا" نمی واردۇر
بیر جرعهسی اوْلسا آنامون نه غمی واردۇر
تک جرعه سۇ باری قۇرۇیان لبلره بسدی
آنجاق دوْداق ایسلاتسا علی اصغره بسدی
دوْغراندێ عَمومدا مگر اکبر سیاقیندا
دۆشدۆ یانار اوْدلاره اوْدا سۇ سوْراغێندا
قوْیدۇن نییه بس نعشینی دوشمن قاباغێندا
یا پئیکرین اوْل اشجع ناسین گتیرئیدون
یا دفن ائلهییب قانلێ لیباسین گتیرئیدون
وای بختیمه اوممود گۆلۆم گؤر نئجه سوْلدۇ
داشدێ اۆرهگیم قانێ گؤزۆم جامینه دوْلدۇ
آخر نئجه دوْغراندێ کی حملی چتین اوْلدۇ
آت اۆسته گلهنمیردی پییاده گتیرئیدون
نعشین بۆکۆب اکبر تک عباده گتیرئیدون
سنلهن نه دانێشدێ بابا اوْل کان-ی-مُروت
آخر نفسینده سنه ائتدی نه وصیّت
ائیله اوْ وصیّتلریده سن بیزه صُحبت
عؤمر ائتسه وفا، ائتسهک اگر عزم-ی-مدینه
نیسگیل آپاراق سؤزلرینی امّ بنینه
تؤکدۆ بۇ فلک باشیمه خاکستر-ی-ماتم
واضحدی اسیر اوْلماقێمێز اوْلدۇ مُسلّم
وئر قانه باتان پرچمینی ساخلاسێن عمّهم
شاید اوْلا بیر گۆن بۇ بلادان قۇتاراق بیز
قانلێ عَلَمین اوْغلۇنا سوْوقات آپاراق بیز
آتدان اؤزۆ دۆشمۆشدۆ عَموم سن یئتیشهنده
یا سن کؤمک ائتدون اوْنا توْپراغه دۆشهنده
آخر بابا هئچ قوْل بوْیۇن اوْلدۇز گؤرۆشهنده
سروون یێخێلان وقتیده سن ال یئتیریبسهن
یا قانه باتان پرچمی یئردهن گؤتۆرۆبسهن
قلبیم سوْیۇمۇر گؤزدهن آخێر بیر بئله قان یاش
سن وئرسوْن اجازه قاچارام مقتله بیر باش
ال باشدان اۇجالدێب باشێ اۆسته آچارام باش
قانێن یاخارام زۆلفیملهن یۆز گؤزه گۆللـهم
غیرتلی عموملان قوْیارام یۆز-یۆزه گۆللـهم
سنگ-ی-فلکه عُقده اوْلۇب صافی-ی-شیشه
فرصت گزیری سایهلی سروی یێخا تیشه
عبّاس وجودی بیزه سایئیدی همیشه
غرق اوْلدۇ گؤزل شوکتیمیز گؤز یاشێمێزدان
سروون یێخێلێب سایه کسیلدی باشێمێزدان
استاد رحیم منزوی اردبیلی
عمّه بۇ ویرانسراده بیر دُرّ-ی-شاهانهیم من
سیز اگر بئش گۆن قوْناقسۇز بۇردا صاحب خانهیم من
شام قێزلارێ دئییرلر بۇ قێزێن یوْخدۇر آتاسێ
حالینی ائیلیر حکایت گؤزیاشێ کؤهنه لیباسی
نئیلیرهم زردوز رختی، یۆزده رنگ-ی-زرد بسیمدیر
کؤهنه بیر پیراهنیله بۇ قارا معجر بسیمدیر
استاد منزوی
اکبریم گلینجه اؤلسهم دفنیمی یۇباندێر عمّه
نعشیمی آلێب ال اۆسته، باشێنه دوْلاندێر عمّه
یوْخ سؤزۆم بۇ اؤلمهک عمّه «امر حیّ لم» یزلدی
باجێلار اؤلهنده امّا قارداشێ اوْلا گؤزهلدی
ائیلهیین بیر آزجا تأخیر، بلکه اکبریمده گلدی
کفن-وْ-دفنیمی بیر آز سن ساخلا ال یۇباندێر عمّه
گؤزلرون فداسی اوْللام خستهسن بیبی آز آغلا
اؤلدۆرهر اؤزۆن حَرَملر آز بۇ قلب-ی-زاری داغلا
اللرون قاداسێن آللام گل بۇ گؤزلریمی باغلا
قانلێ اشگیلهن سارالمێش رنگون آز بوْیاندێر عمّه
گرچه قاره گۆن الینده قۇرتارۇر بۇ بختی قاره
وار ولی بیر عمده دردیم، گل سنه ائدیم اشاره
ناگهانی گلسه اکبر، گؤزلریمی آچ دوباره
اکبری منیله بیر آن روبرو دایاندێر عمّه
شئمری سن چاغێرما عمّه قلبیده جراحتیم وار
قوْلدان آچماسێن طنابیم دیلده آیرێ نیّتیم وار
قبره قوْی بۇ حالتیلهن جدّیمه شکایتیم وار
سنده خلقه ظۆلم-ی-شئمری، نطقیویله آندێر عمّه
باشۇن آچما ائتمه ناله، قلبیم اوْلدۇ غۆصصهدهن قان
سن منه آنالێق ائتدۇن جانیوه رقیّه قۇربان
باشێم آلما سینوْن اۆسته، توْپراق اۆسته قوْی وئریم جان
زحمتیمی چوْخ چکیبسهن، آز منی اۇتاندێر عمّه
آغلاما دئمه غریب-ی-بیوطن، رقیّه لایلای
هئچ دیله گتیرمه جیسمی، بیکفن رقیّه لایلای
سسله شئمر-ی-شوم الیندهن، دینجهلهن رقیّه لایلای
قلب-ی-اهل-ی-شامی، آه-ی-آتشیمه یاندێر عمّه
بیسبب دئنهن بۇ غمده قانه گؤز یاشێم دوْلانماز
الده اؤلدۆرۆب بۇ طئفلی شئمر-ی-دون گینه اۇتانماز
قمچیلهر یئرینی امّا گؤرمهیینجه خلق اینانماز
کؤینهگیم چێخارت بۇ خلقی سن اؤزۆن ایناندێر عمّه
استاد رحیم منزوی اردبیلی
سرعتله اوْلما عازم-ی-مئیدان حسینیم صبر ائله
جانیم گئدهن یوْللارۇوا، قۇربان حسینیم صبر ائله
قارداش بیلیرسن هئجریوه یوْخ قلب-ی-زینبده دؤزۆم
هئجران غمینده تاب ائدیم آیا نه نوعی من دؤزۆم
سن بیل آنام زهرا دایان گئتمه حسینیم وار سؤزۆم
ائتمه بۇ نوعی قلبیمی آلقان حسینیم صبر ائله
لطف ائیله یوْل اۆسته بیرآز وقتۇن یۇباندێر گئت حسین
هر نه سؤزۆن وار زینب-ی-مظلومه آندێر گئت حسین
گل بۇ بلالی زینبی باشه دوْلاندێر گئت حسین
قوْیما دالۇنجا گؤزلری گیریان حسینیم صبر ائله
سؤز یوْخ شماتت منصبی بیر رشتهی-ی-ارزندهدیر
مین نیسگیل امّا گئیدیگۇن بۇ کؤهنه پیراهندهدیر
سلطانه کؤهنه پیرهن، آیا نئجه زیبندهدیر
ائتدی بۇ نیسگیل قلبیمی سوزان حسینیم صبر ائله
یوْلما دئییرسن زۆلفیوی، سس چکمه گلمه شیوهنه
بس نئیلئیوم من بینوا، سن باری بیر فکر ائت منه
چون یئددی قارداشدان بۇ گۆن، گؤز تیکمیشهم من بیر سنه
سنسن اۇمیدی زینبین، الآن حسینیم صبر ائله
ای چشم-ی-حوره توتییا، خاک-ی-قدوم-ی-اطیبون
زهرایه خاطیر صبر ائله بیر لحظه ساخلا مرکبون
خنجر بوْغازۇن اؤپمهمیش قوْی گلسین اؤپسین زینبون
زهرا سؤزۆنده قالماسێن نُقصان حسینیم صبر ائله
تاپشێرمێسان اطفالیوه مهر-وْ-نوازش گؤرسهدیم
سسلیر هامێ بیردهن منی بیلمهم کیمه من سس وئریم
هانسێن آلێم آغۇشیمه، هانسێ بالانێ دیندیریم
بۇ ماجرایه قالمێشام حئیران حسینیم صبر ائله
وئر اذن اؤزۆم سردار اوْلۇم، بۇ جمع-ی-سرگردانه من
نظم-وْ-نظامیلهن چکیم، آلاللهی مئیدانه من
زۆلفۆم الیمده یالواریم، بۇ لئشگهر-ی-عُدوانه من
تا بلکه سندهن ال چکه عُدوان حسینیم صبر ائله
استاد رحیم منزوی اردبیلی
ای خاندان-ی-عیصمته، زهرای ثانی زینبیم
آخر وداعیمدیر چاغێر، آل-ی-عبانی زینبیم
سلطانه دونیا تنگ اوْلار، انصار-وْ-یاوهردهن سوْرا
جان-وْ-جهانی نئیلیرهم، شئبه-ی-پیمبردهن سوْرا
من ایچمهرهم دونیا سۇیۇن، شهزاده اکبردهن سوْرا
لب تئشنه جان وئررهم تاپام آب-ی-بقانی زینبیم
دۆزدۆر چوْخ آغلار دهریده، بیکس باجێ قارداشێنا
امّا باجێ سن چوْخ اؤزون غرق ائیلهمه گؤز یاشێنا
الله ریضاسی سن فقط، ال چک رقیّهم باشێنا
ساخلا اؤزون نازیله اوْل نازلێ بالانێ زینبیم
چوْخ آغلایێب آغلاتما سن بۇ دیدهی-ی-خونباریمی
آخر وداعیمدهن اؤزون آگاه ائله قێزلارێمێ
یێغ باشێما باشسێز قالان اطفال-ی-گۆل روخساریمی
ائعلان ائله بۆلبۆللره فصل-ی-خزانی زینبیم
تئز-تئز یانێقلێ آهیلهن گؤینهتمه قلبیم یارهسین
قێزلارێ سسله ایندیدهن ائیله سوْیۇلماق چارهسین
بیربیر سوْیۇندۇر جامهسین، رأفتله آل گوشوارهسین
گئیدیر دوباره اگنینه کؤهنه قبانی زینبیم
باجێ یئتیر پئیغامیمی اؤز عترهتیمه جابهجا
اوْلسۇن اسیر اوْلماغلێغا، آماده آل-ی-مصطفیٰ
من کؤهنه کؤینهک گئیمیشهم سیزده گئیین کؤهنه قبا
قوْیماز بۇ لئشگهر، چادُر-ی-زرّین نیقابی زینبیم
بیرده آماندێر زینبیم باش یوْلما مقتلده منه
شامه گئدهنده باش آچێق لازیمدی اؤز زۆلفۆن سنه
تؤک زۆلفیوی روخساریوه قوْیما جمالون گؤرسهنه
چون مه یۆزۆن ائیلهر خجل شمس-ی-هُدانی زینبیم
سنسن پرستاری باجێ باشسێز قالان اولادیمێن
سنلهندی هر دردسری بۇ عترت-ی-ناشادیمین
شامێن یوْلۇندا جان سنین جان سیّد-ی-سجّادیمین
قوْیما اوْنا ایذا ائده، شئمر-وْ-سنانی زینبیم
دوشمن وۇراندا قێزلارێ قوْللارۇوۇ ائیله سپر
قوْیما اوْلارێ اینجیده، بۇ کوفیان-ی-بد سیَر
شئمرین الینده قمچیسی، گؤرسه رقیّهم غش ائدهر
بیر آه چکسه آغلادار، اهل-ی-سمانی زینبیم
استاد رحیم منزوی اردبیلی