مینا تک بیر اووج قان

گول کیمی هر کیم کی، گولزار ایچره نقد جانی وار،

سعی‌یله تؤکسون سنین یولونا تا ایمکانی وار

تا آیاغین تورپاغینا تؤکمه‌سین دوتماز قرار،

هر کیمین مجلیس‌ده مینا تک بیر اووج قانی وار

نه عجب عاشیق‌لری گر باشدان آچسون نازیله،

کاکیلی مشگین کیمی هر کیم کی، سرگردانی وار

ائیله ییبدور نقطه‌ی خالین منی پرکار سیز،

یوقسا دریا اوزره هر بیر قطره‌نین دورانی وار

گزدیررلر ال به ال داغین کؤنول‌لر پاره‌سی،

یئرده قالماز جام تک هر کیم کی، ایستی قانی وار

پوچدی هر سؤز کی، دئیرلر معرفت‌دن اهلی قال،

بحردن چیخماز صدف تا گؤوهری غلطانی وار

چوخ دگیل حئیرت یئری گر وارسا شیرین سؤزلری،

طوطی‌نی صائیب، نظرده گوزگی تک میدانی وار

شاعر: صائب تبریزی

گؤردی‌لر لعلی لبین

اولمادی خورشیدیدن داغلاردا رنگین قاشلار،

گؤردی‌لر لعلی لبین قان ترله‌دیلر داشلار

قیلدی پیدا حکمی تقویمی کهن گول دفتری،

آچدیلار تا چهره‌ی دیلداریمی نقّاشلار

قیلمادیلار سینه‌ی افکاریمی آماجگاه،

اکسیک ائتدیلر بیزیملن اول موقوّس قاشلار

عاشیقی صادق بیلیر سنگی ملامت قدرینی،

مخزنی سلطانا لاییقدیر بو یارار داشلار

گونو دوندن ائل دئدیم ترک ائتمه‌سون یولداشلیغی،

چون قارا اولدو گونوم، یاد اولدولار قارداشلار

یول اگر حقدیر، چکه‌ر یولسوزدان آخیر انتیقام،

ائله تاپشیر، چیخدیلار یولدان اگر یولداشلار

اولدو مغلوبی هوای نفسی ایستیلای عقل،

آلدیلار حاکیم الینده‌ن اختییار اوو باشلار

چون کؤنول بی‌نور اولوب مطلق عنان آلور هوس،

قاش قارالاندا چیقارلار یووادان خفّاشلار

مهریبان اولماز نسیمی صبحدم هرگیز سنه،

شمع تک تا تؤکمه‌سم صائیب، گؤزوندن یاشلار

شاعر: صائب تبریزی

زولفی پریشان

ائلدن چیخارام زولفی پریشانینی گؤرگج،

ایشدن گئدرم سروی خورامانینی گؤرگج

سوسوزلارا گر جان آخیدیر چشمه‌ئی حیوان،

من جان وئررم چشمه‌ئی حیوانینی گؤرگج

گر باغلاموسان ائل گؤزونو شرمی عذارین،

جاندان کسیلور خنجری مژگانینی گؤرگج

ریحان کی، نزاکت تؤکولوردی قلمین‌دن،

خط تیره چکر زولفی پریشانینی گؤرگج

بولبول کی، گولون لعلی‌لبیندن سؤز آلیردی،

دیلی دولاشیر غنچه‌ئی خندانینی گؤرگج

ریضوان کی، بهشت‌ین یئمیشی گؤزونه گلمز،

دیشلر اَلینی سیبی زنخدانینی گؤرگج

یئردن خطی ریحان ورقین پاک سیلیب‌دیر،

نقاشی گولوستان، خطی ریحانینی گؤرگج

گول رنگی آلور، صوبح، ایکی خالی ترین‌دن،

خورشیدی عذار، مؤحریقی اَفشانینی گؤرگج

مژگاینی آلیب قانلو یاشیندان رگی یاقوت،

صائیب لبی لعلی گؤهر اَفشانینی گؤرگج

شاعر: صائب تبریزی

مئی‌یه باتمیش دوداغین

مئی‌یه باتمیش دوداغین گور نه گئتیردی باشیما

هوشومو باشدان آلیب سونرا گوونمه هوشوما

ائله سنسیزله‌میشم نانه‌یه بنزر اوره‌یم

گل تَلَس، گل عزیزیم، بیر باشا گیر آغوشوما

اؤز الینله بو جواهیر ائوینی باغلامیسان

باری اینصاف ائله سن گل بو لبی خاموشوما

قارا زولفون یوخودا سؤیله‌ییر افسانه منه

او دؤنوب صوبحه جن هم صوحبتیمه سیر داشیما

منم اول قومری کی صائیب او یاشیل سرو آغاجی

یارپاغیندان عبا تیکمیش کی گلیر چوخ خوشوما

شاعر: صائب تبریزی

لاییق دئییلم

غم چکمه‌یه لاییق دئییلم، شاد ائله اون‌دا

ویرانه اگر ائتمه‌سن، آباد ائله اون‌دا

تاپشیرما منی خاطیراتا، ائیله‌مه میسکین،

یول گئتمه‌یه وار قوّتیم، آزاد ائله اون‌دا

بلکه چاتام او قافیلیه، اوردادی قلبیم،

هیمّت‌لی آغام، لاییقی ایمداد ائله اون‌دا

اولموش کیمیم، یوخدو بدن‌ده بئله قانیم،

دیوانه دئییب سن یئنه ایجاد ائله اون‌دا

دونیا ائشی‌دیر فریادینی صائیب‌ین، آنجاق،

سن‌ده ائشیدیب فریادیمی یاد ائله اون‌دا

شاعر: صائب تبریزی

توپراغا دوندوم

ازدیکجه فلک، توپراغا دؤندوم بو جاهان‌دا،

یوخ اوزگه دنیم من اویودم بیر داها اون‌دا

دیوار دیبینه چکسه‌ده یوخسوللوغوم آنجاق،

هوما قوشو دایه‌مدی منیم من دوغولان‌دا

غم داغی اینان، قامتیمی ایدی کمان‌تک،

آنجاق منی سیندیرمادی بیر لحظه بوران‌دا

دؤوران منه نه وئردی، نه گئیدیردی، سوروشما،

روزوم غضبیم، پالتاریم عیبیم‌دی جاهان‌دا

داغ صبریم‌ایله اویغودایام داغ اتیینده،

خنجرله آییرماق بیزی مومکونمو بیر آن‌دا!؟

اوز سوفره‌مه مئهمان اولورام بسدی منیم چون،

گؤز دیکمرم اوزگه علینه، قوپسا طوفان‌دا

کام آلماسادا هر ایکی دونیادا بو عاشق،

قلبی آچیلیر یاری گؤروب حئیران اولان‌دا

بیر دؤرّم، اوزوم، قیمتیمی وئرمه‌سه‌لرده،

آیدین‌دی منه، یوخدو خریدار بو مکان‌دا

من کی، فلکه مینّت‌ایله باشیمی اَیمم،

ازسین، نه اولار، ایسته‌مرم اوندان آمان‌دا

ظاهرده منم وارلی کی، باطین‌ده فقیرم،

غؤنچه کیمیم پالتارین آلتین‌دا قالان‌دا

الوان لیباسا یوخ هوسیم، کعبه تکین من،

بسدیر دَییشم پالتاریمی ایل قورتاران‌دا

سایه‌مده اگر شهرته چاتمیشسا بو خالقیم،

روزوم سوموک اولموشدو هوما تک بو مکان‌دا

صائیب، سنی کیم باغلادی بو مولکه کی قالدین؟

ایندی سنه زیندان‌دی بورا، قال، هله یان‌دا!

شاعر: صائب تبریزی

مجلسی گول‌لر

قوروبدو مجلسی گول‌لر یئنه گولوستان‌دا،

چیچک‌لی سوفره‌دی بو باغ‌داکی خیابان‌دا

او آغ لچک‌لرایله هر طرف گوله بورونوب،

ائله بیر آغ گئیینن لیلی‌دیر بو بوستان‌دا

گوموش تک آغ گؤرونور قاپ‌قارا او تورپاق‌دا،

شکوفه یارپاغی‌دیر دقّت ائتسن هر یان‌دا

اورک‌ده‌کی غباری آچماغا باغ عاجز ایدی،

بهار چیچک‌لر ایله وئردی قلبه درمان‌دا

گئجه‌نی صوبحه کیمی یاتمایان او مستلر تک،

اوفوقده گولدو سحر سانکی بیر بیاض دون‌دا

نئجه سؤز اهلینی من حئیران ائتمه‌ییم، صائیب،

الینده‌کی بو قلم بیتمز هر نیستان‌دا

شاعر: صائب تبریزی

کرچایی

آیری داغلار کیمی قول- قاناد آتان،

جوشغون دالغالاری بولوتا چاتان

غمزه‌لر گوسترن، عشوه‌لر ساتان

چوخ اولور قوناغین، یغناغین سنین

قورخونج قایالاری یئللرتک اًنن،

گونشدن رنگ آلیب، آیلا بزه‌نن،

نه‌لر آندیریرسان بو گئدیشله سن،

شانلی، شهرتلی‌دیر اوجاغین سنین

تفلیسین آرخاسی، قازاغین بئلی

هر ایکی‌سی سنین، سنه دوست ائلی

بوشالار قوینونا داغلارین سئلی،

کورپه بولاقلار دیر اورتاغین سنین

چوخلاری حسنینه حیران قالدیلار

چوخ ایگیدلر سندن الهام آلدیلار،

توپ- تفنگ آتدیلار، نعره چالدیلار،

کچدی اودملرین، او چاغین سنین

اولدوزلار قوینونا شفق‌لر ساچار،

سسین‌دن اردولار، کاروانلار قاچار

سن گزدیگین یئرلر گل چیچک آچار،

چونکی اوغورلودور آیاغین سنین

باغلانان یوللارین آچیلار هر یاز،

سنی گورن گوزلر سندن آیریلماز،

کونلوم تک دالغانی، ده‌لی‌سن بیر آز،

آلینیر عالمده سوراغین سنین

آی دوغوب سینه‌نه کولگه سالاندا

دییه‌ر: «گولمه‌میشم سنسیز قالاندا»

چوبانین، ناخیرچین توتک چالاندا

گمراه اولار یانین، یانچاغین سنین.

شاعیر: صمد وورغون 1929

چیچک

گؤزل چیچک، دالغالانیر داغ دوشی

نه‌دیر او ترپه‌نیش، دریامی یوخسا؟

سؤیله‌دی‌لر سنی کؤنلومون اوشی،

حقیقت‌می، اودا خولیامی یوخسا؟

او سرین بولوتلار، او بویلو چنار

هپ سنه گولومسه‌ر، سنه چیرپینار

دییر‌سن تیتره‌دیر منی روزگار،

بو درده مبتلا دنیامی یوخسا؟

امردیم حوسنیندن مین اینجه دویغو،

ساردیمی چهره‌نی خزان سویوغو!

الوداع، الوداع، دالدیغیم اویغو،

اینانمام ئولوممی، رؤیامی یوخسا؟

شاعیر: صمد وورغون 1927

مستانه سیز اولماز

زولفون نییه بیر آن، گؤزه‌لیم، شانه‌سیز اولماز!

عادت بئله‌دیر عشق ائوی بیگانه‌سیز اولماز!

طعن ائیله‌مه، زولفوندن اوُزاقلاشماسا کؤنلوم

بیر یئرده کی زنجیر اولا، دیوانه‌سیز اولماز!

غمدن یانیرام، رویونی گؤسترمه رقیبه

بیر شمع کی، شؤق آرتیرا، پروانه سیز اولماز!

مخمور گؤزون قویمادی بیر کؤنلومی راحت

بیردم بو ستم خانه‌سی مستانه‌سیز اولماز!

سن شوقِ لبِ یارایله ایچ، باده ایچینده

کیمدیر دییه، مئی مجلیسی پیمانه‌سیز اولماز!

بیر دلبرین عشقینده بوتون دیللره دوشدوم

هنگامه‌دیر، عشق عالمی، افسانه‌سیز اولماز!

واحد مئی ایچیر گیزلی، دئییرلردی ائشیتدیم

او رندِ خراباتی دیر، میخانه‌سیز اولماز!

شاعیر: علی آقا واحد

صنعان

کؤنلوم کیمی، او زولفه یئنه شانه باغلانوب

جان رشته‌سی او زولـفِ پریشانه باغلانوب

آهسته شانه چک، گؤزه‌لیم، تار زولفونه،

هـر بیـر تئلینده مین دلِ دیوانه باغلانوب

ساقی، آپارما مست منی خُم آیاغینا

مستانه‌لر یاتوب، درِ میخانه باغلانوب

کؤنلوم، اوزون غمیندن، اولوب باغلی زولفونه

پروانه سانکی شمع شبستانه باغلانوب

میخانه‌لر آچیلدی، قدح‌لرده نشئه وار

محنت بیناسی، خانه‌ی ویرانه باغلانوب

صنعان اگرچه باغلادی زونّـار، بیلمه‌دی

عاشیق همیشه طـره‌ی جانانه باغلانوب

واحد! زمانه حوری‌لری کئچدی جنّتی

زاهید هنوز روضه‌ی رضوانه باغلانوب

شاعیر: علی آقا واحد

قانه قان ائتمه

قارا زولفون اومه رخساره، ای گول، سایه‌بان ائتمه!

هلالی ظلمـت شبده بولوت ایچره نهان ائتمه!

لبیندن دیشله‌دیم، قان ائیله‌دیم، سانکی خطا ائتدیم

آماندیر، سن داها گل تؤکمه قانیم، قانه قان ائتمه!

او گول رویونده کی خال سیه‌دن احتیاط ایله

بهشتین باغینا هندونی، گؤزله، باغبان ائتمه!

غمیندن تنگه گلدیم، سرو بویلوم، بؤیله ناز اولماز

ترّحم ائیله، کویندا گؤزوم یاشین روان ائتمه!

کؤنول، وهم ائیله جانین‌دان، دوشرسن صیدوش دامه

گئدیب هـر نا کسین زولفون اؤزونه آشیان ائتمه!

آپاردی کؤنلومو زولفون خیالی، ظالیم، انصاف ائت!

هیچ اولمازسا،آلوبسان کؤنلومو،گل قصد جان ائتمه!

رقیبین باشقادیر کویونده گزمک‌دن تمناسی

اینانما، سئوگولوم، هر خائنی محرم گومان ائتمه!

اؤزون، واحد! مقصرسن، سنه جانان نه جؤر ائتسه

کؤنول وئرمه گؤزه‌للر زولفونه، آه و فغان ائتمه!

شاعر: علی آقا واحد

مردانه دولانسین

زولفونده نه لازیم، گؤزلیم، شانه دولانسین؟

قویما او حرمخانه‌نی بیگانه دولانسین

عیب ایله‌مه، کویونده دولانسام گئجه گوندوز

شمعین گره‌ک اطرافینه پروانه دولانسین

ساقی! دولانیم باشینا، مئی جامینی گزدیر،

سرمست اولوم، باشیما میخانه دولانسین

اول زولفه کونول وئرمه، دییرلر منه؛ اَل چک!

اونسوز نئجه بس بو دل دیوانه دولانسین

مجنون نه برابر منه! صحرالره قاچدی

عشق اهلی اودور عرصه‌ده مردانه دولانسین

اغیار ایله اؤز یارینی همدم گؤرن عاشیق!

دوشسون او گرک دشت و بیابانه دولانسین

سرخوش‌لیق ایله عؤمرونی صرف ائیله‌مه «واحد»!

عارف اونا دییرلر کی، حکیمانه دولانسین

شاعیر: علی آقا واحد

گؤزه‌لیم

سانما، کؤنلوم بو چمن‌زارده خرّم کیمی‌دیر

یارسیز عاشیقه جنّت‌ده جهنم کیمی‌دیر

آچیلیر، زولفون آچیلدیقجا، توتولمش کؤنلوم

زولفونی گؤرمه دیگیم گون منه ماتم کیمی‌دیر

ییخدی مین عاشیقِ بیچاره‌نی، بیر غمزه‌ن اوخی

مرحبا گؤزلرینین شستینه!، رستم کیمی‌دیر

اؤزونی قاشلارینین طاقینه بنزه‌تمک اوچون

گور، هلالی فلکین ایندییه‌جن خم کیمی‌دیر

گؤزه‌لیم، لاله یاناغیندا کی تر قطره‌لرین

تازه گول یارپاغی اوستنده کی شبنم کیمی‌دیر

بیر فقیر عاشیق اگر سئوگیلی جانانی ایله

توتا مئی جامینی الده، او هله جـم کیمی‌دیر

دلبریم همدم اولوب غیرایله، واحد، نه غمیم!

غم عشقی منه هیجران گونی همـدم کیمی‌دیر

شاعیر: علی آقا واحد

باغرینه قان ائتمه!

مجنونه دییه‌ن یـوخدور: ای عـاشیقِ بیچاره

لیلی‌له نه کارین وار، قویسون سنی آواره؟

عشق عالمی عشاقه بیر وادیِ محنت‌دیر

فرهادی سالوب داغه، منصوری چکـوب داره!

پـایـانِ غـم عشقـی تفسیره نه حاجت وار

گؤر، بیر نئجه پروانه شـؤق ایله یانار ناره!

دنیا او قدر لیلی، مجنون یئتیروبدور کی

سایسان، نه قدر گویده وار ثابت و سیّاره

هر لاله رخ عشقینده اؤز باغرینی قان ائتمه!

هر دردی چکیر بولبول، گول قسمت اولور خاره

بی‌مهر گــؤزه‌للردن عالمده وفا اوُمما

میل‌ین سالاجاق بونلار آخر یئنه اغیاره

واحد! بیز اؤلوب گئتدیک، مهرایله، محبتّله

دنیا دؤنـه‌جک بیر گون بیر صحنه‌ی گلزاره!

شاعیر: علی آقا واحد