بیر گؤزو شهلا دلیسی

اولدی کؤنلوم یئنه بیر زولف چلیپا دلیسی

دوشدو زنجیره نه خوش یئرده بو سئودا دلیسی

عور و عریان،  باش آچیق، اوز چئویریب صحرایه

قویدو مجنونو یاری یولدا بو صحرا دلیسی

عاشیق سوخته دیر، بولبول شئیدا کی دگیل؛

کی اولوبدور دئیه سن بیر گول حمرا دلیسی!

ربّ اَرنی دیلنین ذیکری، دؤنوب موسایا

دشت ایمنده اولوب نور تجلی دلیسی

چوخلارین مست قیلیب ساقی میخانه عشق

گؤرمدی کیمسه منیم تک بئله رسوا دلیسی

دئمه فرهادیله مجنون دلیدیر بیر بری باخ

بیری شیرین دلیسیدر، بیری لیلی دلیسی

کنج وحدتده تباه اولدی عزیز عؤمروم حئییف!

اولمادی یار منه بیر بوت زیبا دلیسی

خوشلاییبدیر گؤره سن هانسی مزارستانی

دیون اول زاهیده ای بیر کؤکه حالوا دلیسی

باشینی آز یئره دؤی، دنگ صیفت، ای حیوان!

آلمادی جنّتی بیر آرپایا مولا دلیسی

گول ایاغینده سحر واختی ییخیلمیشدیم مست

بیری سسلندی کی ای بیر گول رعنا دلیسی

بیر آییل گؤر کی نباتی نئجه اوراد ائیلر

نه یاتیبسان بئله؟ ای بیر گؤزو شهلا دلیسی!

سید ابوالقاسم نباتی