ش | ی | د | س | چ | پ | ج |
1 | ||||||
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 |
پای پیاده دوشورم چوللره،
خار مغیلان گورورم، قورخمورام
سیر ائدیرم بر و بیابانلاری،
غول بیابان گورورم، قورخمورام
گاه اولورام بحرده زورقنشین،
دالغالی طوفان گََورورم، قورخمورام
گه چیخیرام ساحله هر یاندا مین،
وحشی غران گورورم، قورخمورام
گاه شفق تک دوشورم داغلارا،
یانقیلی وولقان گورورم، قورخمورام
گه انیرم سایه تک اورمانلارا،
ییرتیجی حیوان گورورم، قورخمورام
اوزقویورام گاه نیستانلارا،
بیر سوری آسلان گورورم، قورخمورام
مقبرهلیکده ائلهرم گه مکان،
قبرده خورتدان گورورم، قورخمورام
منزل اولور گه منه ویرانهلر،
جن گورورم، جان گورورم، قورخمورام
بو کرهی ارضده من مختصر،
مختلف الوان گورورم، قورخمورام
خارجی ملکوندهده حتی گزیب،
چوخ تحف انسان گورورم، قورخمورام
لیک بو قورخمازلیقایله، دوغروسی!
آی داداش، واللهی، باللهی، تاللهی!
هاردا مسلمان گورورم، قورخورام
بیسبب قورخمئیورام وجهی وار:
نیلهییم آخر بو یوخ اولموشلارین
فیکرینی قان- قان گورورم، قورخورام
قورخورام، قورخورام، قورخورام! ...
شاعر: مرحوم میرزه علیاکبر صابر
بو چرخ فلک ترسینه دوران ائدیر ایندی!
فعله ده اؤزون داخل انسان ائدیر ایندی!
اولماز بو کی، هر امره دخالت ائده فعله،
دولتلی اولان یئرده جسارت ائده فعله،
آسوده نفس چکمگه حالت ائده فعله،
یا این کی حقوق اوسته عداوت ائده فعله،
بو چرخ فلک ترسینه دوران ائدیر ایندی!
فعله ده اؤزون داخل انسان ائدیر ایندی!
فعله، منه بیر سؤیله، نهدن حرمتین اولسون؟
آخر نه سبب سؤز دئمگه قدرتین اولسون؟
ال چک، بالا، دولتلیلره خدمتین اولسون،
آز– چوخ سنه وئردیکلرینه منتین اولسون،
بو چرخ فلک ترسینه دوران ائدیر ایندی!
فعله ده اؤزون داخل انسان ائدیر ایندی!
دولتلی آماندیر، اؤزونو سالما بلایه!
فعله سؤزی حق اولسادا، باخما او صدایه،
یول وئرمه نفس چکمگه هرگز فقرایه!
اؤز شأنینی پوچ ائیلهمه هر بی سر و پایه!
بو چرخ فلک ترسینه دوران ائدیر ایندی!
فعله ده اؤزون داخل انسان ائدیر ایندی!
آلدانما، فقیرین اولاماز عقلی، ذکاسی،
چون یوخدور اونون سن کیمی پاکیزه لباسی،
یوخ ثروتی، یوخ دولتی، یوخ شالی، عباسی،
وار کهنه چوخاسی، دخی بیر تکجه قباسی،
بو چرخ فلک ترسینه دوران ائدیر ایندی!
فعله ده اؤزون داخل انسان ائدیر ایندی!
ایسترسن اگر اولماغا آسوده جهاندا،
تا اولمیاسان غملره آلوده جهاندا،
فعله اوزونه باخما بو بیهوده جهاندا،
اؤز فکرینی چک، اول دخی فرسوده جهاندا
بو چرخ فلک ترسینه دوران ائدیر ایندی!
فعله ده اؤزون داخل انسان ائدیر ایندی!
گؤر ملتینین دردینی، آختارما دواسین!
ال چکمه یتیمین باشینا، کسمه صداسین،
زنهار، قویوب دهرده بیر خیر بناسین،
یاد ائیلمه، شاد ائیله مه ملت فقراسین...
بو چرخ فلک ترسینه دوران ائدیر ایندی!
فعله ده اؤزون داخل انسان ائدیر ایندی!
شاعر: مرحوم میرزه علیاکبر صابر
دشمنلره محتاج اولور- اولسون نه ایشیم وار؟
قوی من توخ اولوم اؤزگهلرایله نهدی کاریم!
دونیا و جهان آج اولور- اولسون نه ایشیم وار؟
سس سالما، یاتانلار آییلار، قوی هله یاتسین،
یاتمیشلاری راضی دگولم، کیمسه اویاتسین،
تک تک آییلان وارسادا، حق دادیمه چاتسین،
من سالم اولوم جمله جهان باتسادا باتسین،
ملّت نئجه تاراج اولور- اولسون، نه ایشیم وار؟
دشمنلره محتاج اولور- اولسون نه ایشیم وار؟
سالما یادیما صحبت تاریخ جهانی،
ایام سلفدن دئمه سؤز بیر ده فلانی،
حال ایسه گتیر میل ائلهییم دولمانی، نانی،
مستقبلی گؤرمک نه گرک، عمردو فانی،
ملّت نئجه تاراج اولور- اولسون، نه ایشیم وار؟
دشمنلره محتاج اولور- اولسون نه ایشیم وار؟
اولاد وطن قوی هله آواره دولانسین،
چرکاب سفالتله الی، باشی بولانسین،
دول عورت ایسه سائله اولسون، اودا یانسین،
آنجاق منیم آوازهی شانیم اوجالانسین،
ملّت نئجه تاراج اولور- اولسون، نه ایشیم وار؟
دشمنلره محتاج اولور- اولسون نه ایشیم وار؟
هر ملّت ائدیر صفحهی دنیاده ترقی،
ائیلر هره بیر منزل و مأواده ترقی،
یورغان دوشهگیمده دوشه گر یاده ترقی،
بیز ده ائدهریک عالم رؤیاده ترقی،
ملّت نئجه تاراج اولور- اولسون، نه ایشیم وار؟
دشمنلره محتاج اولور- اولسون نه ایشیم وار؟
شاعر: میرزا علی اکبر صابر(هوپ هوپ نامه)